රෝවන් පෙරේරා

තබ්බෝව ජලාශය යටතේ වගා කර ඇති  කුඹුරු වලට ජලාශයේ පවතින ජලය ප්‍රමාණවත් නොවීමට ඉඩ ඇති බව පුත්තලම වාරිමාර්ග ඉංජිනේරු දීලීප  හෙට්ටිආරච්චි මහතා පවසයි.

පැවති අධික වර්ෂාවත් සමඟ අක්කර අඩි 15,400 ක ජල ධාරිතාවක්  රඳවන තබ්බෝව ජලාශයේ ජල මට්ටම සීඝ්‍රයෙන් ඉහල යෑම හේතුවෙන් සියලු වාන් දොරටු විවෟත කිරීමට සිදුවීය.

මාස එක හමාරක පමණ කාලයක් ගත වන විට ජලාශයේ ජල මට්ටම අක්කර අඩි 10,000 කට වඩා අඩුවීම තුල අවධානම් තත්ත්වයක් ඇතිවී තිබෙන බවත් ජලය අපතේ නොයවා ප්‍රයෝජනයට ගන්නා ලෙස වාරිමාර්ග ඉංජිනේරුවරයා ගොවීන්ගෙන් ඉල්ලා සිටියි.

වසර දෙකක නියඟය හමාර කරමින් වැසි පතිත වීමත් සමඟ කන්න හතරක් කෘෂිකර්මාන්තයේ නිරතවීමට නොහැකිව සිටී ගොවින් කන්න රැස්වීම් පවත්වා නිලධාරීන්ගේ උපදෙස් මත කුඹුරු අක්කර 2500 ආසන්න ප්‍රමාණයක් වගාකර  තිබේ.

වැසි සහිත කාලගුණය පහව යෑමත් සමග වැව්,අමුණු, ජලාශවල ජල මට්ටම ඉතාමත් සීඝ්‍රයෙන් පහත වැටීමට පටන් ගෙන ඇත.දැඩි හිරු රශ්මියත් , සුලං තත්වයත්  ,වන සතුන් මෙන්ම ජල ව්‍යාපෘති සඳහා තබ්බෝව ජලාශයේ ජලය ලබා ගැනීමත් වැනි හේතූන් නිසා වැවේ ජල මට්ටම සීඝ්‍රයෙන් පහත වැටීම සිදුවන බව වරිමාර්ග ඉංජිනේරුවරයා ප්‍රකාශ කලේය.

අස්වද්දා ඇති කුඹුරු වලට තවමත් මාස එක හමාරක්වත් නොමැති බවත් ඉදිරියට මාස දෙකක් පමණ ජලාශයේ ජලය කුඹුරු වලට මුදා හැරීමට සිදුවන බවත් වර්ෂා පතනයක් නොලැබුණහොත් මාස දෙකක් පමණ ගත වන විට ජලාශයේ ජලමට්ටම අඩුම මට්ටමකට පහත වැටෙන බවත් ඔහු සඳහන් කරයි.