(විජේරත්න රත්නායක )
 
ඌව පළාත් සභාව යටතේ පාලනය වන පාසල්වල අනධ්‍යයන සේවකයින් 1200 කට අධික පිරිසකට මාස දෙකක වැටුප් ගෙවා නොමැති බව ලංකා ගුරුසේවා සංගමය කියයි.
 
ලංකා ගුරුසේවා සංගමයේ ඌව පළාත් ලේකම් ප්‍රියන්ත වරුෂමාන මහතා සඳහන් කළේ මෙම 2019 පෙබරවාරි, මාර්තු යන මාසවල ගුරු වැටුප් ගෙවා ඇතත් එම මාසවලට අදාළව පාසල් අනධ්‍යයන සේවකයින්ට වැටුප් නොගෙවීම හේතුවෙන් ඔවුන් දැඩි අසීරුතායට පත්ව සිටින බවයි.
 
එළඹෙන අලුත් අවුරුදු උත්සව සමයත් සමඟ මෙසේ මාස දෙකක වැටුප් නොලැබීම නිසා එම සේවකයින් හා ඔවුන්ගේ පවුල්වල සාමාජිකයින් දැඩි අසරණ භාවයට හා කණස්සල්ලට පත්ව සිටින බවත් ඌව පළාතේ අධ්‍යාපන බලධාරීන් ඒ සම්බන්ධයෙන් කඩිනම් පියවරක් ගතයුතුව ඇති බවත් ඒ මහතා පැවසීය.
 
මේ සම්බන්ධයෙන් අදහස් දැක්වූ අධ්‍යාපන අනධ්‍යයන සේවක සංගමයේ බදුල්ල දිස්ත්‍රික් සංවිධායක ලේකම් එම්.ඩී.ආනන්ද සිල්වා මහතා පැවසුවේ අධ්‍යාපන අනධ්‍යයන සේවක වැටුප් ප්‍රමාද කිරීම අදාළ බලධාරීන් විසින් නිරන්තරයෙන් සිදුකරන අතර දැඩි අරගලයකින් පසු ඉකුත් ජනවාරි මස ඔවුන්ගේ වැටුප ලබාගැනීමට හැකිවුවත් එළඹෙන අලුත් අවුරුද්ද අබිමුව අධ්‍යාපන අනධ්‍යයන සේවයේ දෙදහසකට ආසන්න පිරිසක් මෙසේ අසරණ කිරීම දැඩි අසාධාරණයක් බවයි.
 
  එසේම ඉදිරි සිංහල අලුත් අවුරුද්දට පෙර මෙම හිඟ වැටුප් ලබාදීමට අදාළ බලධාරීන් පියවර නොගතහොත් ඊට එරෙහිව දැඩි වෘත්තීය සමිති ක්‍රියාමාර්ගයකට අවතීර්ණ වීමට සිදුවන බවද ඒ මහතා පැවසීය.