(ජේ.කේ.එල් චාමින්ද)

දකුණු පළාතේ වෙනත් රෝහල්වල සිට දැඩි අසාධ්‍ය  තත්වයේ පසුවන ළදරුවන් කරාපිටිය රෝහලේ ළදරු දැඩි සත්කාර ඒකකයට ගෙන එම සඳහා   සියලු පහසුකම් වලින් යුත් විශේෂිත ගිලන් රථයක් මේ දිනවල  සුදානම් කරමින් පවතින බවත් ඉදිරි සති දෙක තුළ  එම ප්‍රවාහන සේවාව ආරම්භ කරන බැව කරාපිටිය රෝහලේ  ළදරු දැඩිසත්කාර ඒකකයේ ප්‍රධානි ළමා රෝග පිළිබද  විශේෂඥ වෛද්‍ය කපිලානි විතානාච්චි මහත්මිය සදහන් කළාය.

  මේ සම්බන්දව විශේෂ පුහුණුව ලැබු වෛද්‍යවරු හෙදියන් ඇතුළු කණ්ඩායමක් අදාල රෝහල වෙත ගොස්  අසාධ්‍ය තත්වයේ පසුවන ළදරුවන්  මෙම  විශේෂිත ගිලන් රථයකින් කරාපිටිය රෝහලේ ළදරු දැඩි සත්කාරක ඒකකය වෙත රැගෙන එමට කටයුතු කරන  බවද  විශේෂඥ වෛද්‍ය කපිලානි විතානාච්චි මහත්මිය පැවසුවාය. 

 මේ පිළිබද අදහස් දක්වමින් ඇය මෙසේද කිවාය.

   ‘අසාධ්‍ය තත්වයේ පසුවන  ළදරුවන් ප්‍රවාහනය කරනු ලබන  විශේෂ ක්‍රමයක් විදියට අපටමෙය  හඳුන්වා දෙන්න පුළුවන්.  අසාධ්‍ය තත්වයේ ළදරුවකු සිටින විට සාමන්‍ය යෙන් කරන්නේ ඒ රෝහලේ ගිලන් රථයකින් ළදරුවා කරාපිටිය රෝහලේ ළදරු දැඩි සත්කාරක ඒකකය වෙත රැගෙන ඒමයි. මේසේ ළදරුවා  රැගෙන එන අතරතුර කාලයේ දි  ළදරුවා සිතල වෙන්න පුළුවන් ,ඔක්සිජන් අඩුවෙන්න  පුළුවන්,සිනි මට්ටම පහළ  ගිහින්  ගොඩක් දේවල් සිදුවෙන්න පුළුවන්.

රෝහලක ඉන්නකම් විතරයි ළදරුවාට ආරක්ෂාව තියෙන්නේ. නමුත් මේ තුළින් කරන්නේ මේ සම්බන්දව පුහුණුව ලැබු වෛද්‍ය කණ්ඩායමක් අදාල රෝහල වෙත ගොස්  ළදරුවාට අවශ්‍ය ප්‍රථිකාර කරලා  විශේෂිත ගිලන් රථයෙන් කරාපිටිය රෝහලේ ළදරු දැඩි සත්කාරක ඒකකයට රැගෙන ඒමයි. මේ ගිලන් රථය  ජංගම දැඩි සත්කාරක ඒකකයක් වගේ.. සියලු පහසුකම් තියෙනවා

 එංගලන්තයේ  ඉදලා වෛද්‍ය කණ්ඩායමක් ඇවිත් මේ සම්බන්දව අපට පුහුණුවක් ලබාදුන්නා. අපේ  ළදරු දැඩිසත්කාර ඒකකයේ  වෛද්‍යවරු හෙදියන් ඇතුළු කණ්ඩායමක්  අදාල රෝහලට ගොස්  ළදරුවා නිරික්ෂණය කරලා අවශ්‍ය ප්‍රථිකරා ලබාදිලා  හොඳ  තත්වයෙන්  ළදරුවා  අපේ ළදරු දැඩි සත්කාරක ඒකකය වෙත රැගෙන එම මෙහි අරමුණ බවද විශේෂඥ වෛද්‍ය කපිලානි විතානාච්චි මහත්මිය සදහන් කළාය.