නිශාන්ත කුමාර
 
රිදීමාලියද්ද ප්‍රදේශීය ලේකම් කොට්ටාසයට අයත් අති  දුෂ්කර ගම්මානයක් වන අන්නාසිගලයාය ගම්මානයේ පවුල් 50 ක් පමණ   මේ දිනවල උග්‍ර ජල හිඟයකට මුහුණ දී සිටිති .

මේ වන විට පවත්නා දැඩි නියඟය හේතුවෙන් මෙම ගම්මානයේ ජනතාව ජලය ලබා ගත් බොහොමයක් ජල මූලාශ්‍ර සිදී යාම මේ තත්වයට හේතුව බව අන්නාසිගලයාය ගම්මු පවසති.

 
ගමේ ස්ථාන කීපයකම ජල මූලාශ්‍ර පිහිටා ඇතත් ගම්මානය තුළ  නිසි ජල සැපයුමක් ක්‍රියාත්මක නොවීමද මීට හේතුවී ඇතැයි ඔවුන් කියති. 

පවත්නා ජල හිගය හේතුවෙන් ගම්මානයේ බොහොමයක් දෙනෙකුට ජලය සොයාගෙන සැතපුම් ගනන් යාමට සිදුව ඇතැයිද මෙම ගම්මු පවසති.

මේ වන විට මෙම ගම්මු මුහුණ දී සිටින ජල ගැටලුව පිළිබඳ ගම්වාසී තරුණයකු වන ඩී බී කුමාර මෙසේ කීය.

අන්නාසිගලයාය කියන්නේ කැළෑබද පිහිටි ගමක්. ගමට ඉහළින් තියෙන්නේ මහ කැළෑව. ඒවගේම රක්ෂිතය. ඒ නිසා මේ ගමේ මිනිස්සුන්ට කදාවත් වතුර හිඟ වුණේ නැහැ. ගම හැම තැනම උල්පත් තියෙනවා. නමුත් එක දිගට ආපු පෑවිල්ල නිසා උල්පත් ටිකයි වතුර නාපු ලිං කදුරු ටිකයි හිදිලා.

බාල්දිවලින් වතුර ගත්ත උල්පත්වලට දැන් පොල්කටු දාල තමයි මිනිස්සු වතුර ගන්නේ. මේ නිසා මිනිස්සුන්ට වතුර ටිකක් ගේන්න, නාන්න හැතැම්ම ගණන් යන්න වෙලා. තව ටික දවසක් පෑවිල්ල ඇල්ලුවොත් මේ ටිකත් හිදිල යාවි. 

ගමට වතුර දෙන ජල යෝජනා ක්‍රමයක් තියෙනවා. මේ වන විට ඒකෙත් වතුර නැහැ. ඒ වගේම ඒකෙන් වතුර ලැබෙන්නෙත් ටික දෙනෙකුට විතරයි.