(බිඟුන් මේනක ගමගේ)

මහින්ද රාජපක්ෂ මහතාට අගමැති ධූරය පිරිනැමීමෙන් පසුව දේශපාලන අර්බුදකාරීත්වයක් නිර්මාණය වී ඇතැයි ද එම තත්ත්වය මත ජනමාධ්‍ය නිදහස නැවතත් අභියෝගයට ලක්ව ඇතැයි ද ජාත්‍යන්තර ජනමාධ්‍යවේදීන්ගේ සංගමය නිවේදනයක් නිකුත් කරමින් සඳහන් කරයි.

ජනමාධ්‍යවේදීන්ට සිදුකළ හිංසන සම්බන්ධයෙන් අපරාධ පරීක්ෂණ දෙපාර්තමේන්තුව මගින් සිදුකෙරුණු පරීක්ෂණවල ප්‍රධාන කාර්යභාරයක් ඉසිලූ පොලිස් පරීක්ෂක නිශාන්ත සිල්වා මහතාගේ සේවා මාරුවත් යළි එය අවලංගු කිරීමත් ගැන සඳහන් කරමින් ජාත්‍යන්තර ජනමාධ්‍යවේදීන්ගේ සංගමය මෙම නිවේදනය නිකුත් කර ඇත.

මෙයට එරෙහිව පෙනී සිටින ජනමාධ්‍ය සංවිධාන නායකයන්ට හා ක්‍රියාකාරීත්වයට තර්ජිත තත්ත්වයක් නිර්මාණය වී ඇතැයිද ඒ සම්බන්ධයෙන් ජාත්‍යන්තර ජනමාධ්‍යවේදීන්ගේ සංගමය දැඩි අවධානයෙන් සිටින්නේ යැයි ද එහි සඳහන් වේ.

සිය හවුල්කාර පාර්ශ්වය වන ශ්‍රී ලංකා වෘත්තීය ජනමාධ්‍යවේදීන්ගේ සංගමය සහ සෙසු සියලු සහෝදර මාධ්‍ය සංවිධාන සමඟ ශ්‍රී ලංකා රජයට ජනමාධ්‍ය නිදහස හා කර්තෘ මණ්ඩල නිදහස තහවුරු කරන්නැයි බල කරන්නේ යැයිද ජාත්‍යන්තර ජනමාධ්‍යවේදීන්ගේ සංගමය සිය නිවේදනය මගින් අවධාරණය කරයි.

තවද ජනමාධ්‍යටත් ජනමාධ්‍යවේදීන්ටත් තර්ජනය කරනු ලබන්නන්ට එරෙහිව නීතිය ක්‍රියාත්මක කරන්නැයි ශ්‍රී ලංකා රජයට බල කරන්නේ යැයිද එම නිවේදනයේ වැඩිදුරටත් සඳහන් වේ.

ජාත්‍යන්තර ජනමාධ්‍යවේදීන්ගේ සංගමය යනු රටවල් 140ක් පුරා පිහිටුවා ඇති ජනමාධ්‍ය වෘත්තීය සමිති 187 කින් සමන්විත ලක්ෂ හයකට අධික සාමාජිකයන් සංඛ්‍යාවක් සිටින ලොව විශාලතම ජනමාධ්‍ය සංවිධානයයි.