(යොහාන් භාසුර)

ජාතික ජනබලවේගයේ හිටපු පාර්ලිමේන්තු මන්ත්‍රී ආචාර්ය හර්ෂණ සූරියප්පෙරුම මහතා මන්ත්‍රී ධූරයෙන් ඉල්ලා අස්වීමෙන් පසු ඇති වූ පුරප්පාඩුවට විශ්‍රාමික දේශීය ආදායම් නියෝජ්‍ය කොමසාරිස්වරයෙක් වන නිශාන්ත ජයවීර මහතා පත්කර තිබේ.

මැතිවරණ කොමිෂන් සභාව එම ගැසට් නිවේදනය අද (7) නිකුත් කළේය.

ජාතික ජන බලවේගයේ ලේකම්වරයා නිශාන්ත ජයවීර මහතාගේ නම මැතිවරණ කොමිෂන් සභාව වෙත යොමු කර තිබූ අතර ඒ අනුව පුරප්පාඩු වූ එම මන්ත්‍රී ධුරය සඳහා ජයවීර මහතාගේ නම ගැසට් කිරීමට මැතිවරණ කොමිසම පියවර ගත්තේය.

නිශාන්ත ජයවීර මහතා දේශිය ආදායම් දෙපාර්තමේන්තුවේ වසර 20 කට අධික කාලයක් සේවය කළ දේශීය ආදායම් නියොජ්‍ය කොමසාරිස්වරයෙක් වන අතර ඒ මහතා වර්තමාන ආණ්ඩුව පත්විමෙන් පසුව මාස කීපයක් සුරාබදු කොමසාරිස් ජනරාල්වරයා ලෙස ද කටයුතු කළේය.

ඒ මහතා පසුගියවය වසරේ දෙසැම්බර් සිට පසුගිය ජූනි 27 වැනිදා දක්වා ජනාධිපති අතිරේක ලේකම්වරයෙක් ලෙස ද කටයුතු කළේය.

ආචාර්ය හර්ෂණ සූරියප්පෙරුම මහතා මුදල් හා ක්‍රමසම්පාදන නියෝජ්‍ය අමාත්‍යවරයා වශයෙන් කටයුතු කළ අතර ඒ මහතා පසුගිය ජූනි මස නියෝජ්‍ය ඇමති ධුරයෙන් සහ මන්ත්‍රී ධුරයෙන් ඉල්ලා අස්විය.

ආචාර්ය හර්ෂණ සූරියප්පෙරුම මහතා ඉන් පසුව මුදල් අමාත්‍යාංශයේ ලේකම් ධූරයට පත්විය.