(බිමල් ශ්‍යාමන්  ජයසිංහ )

සංවිධානාත්මක  අපරාධ කල්ලි නායක ගනේ මුල්ල සංජීව නමැත්තාගේ ඝාතනය සම්බන්ධයෙන් අත්අඩංගුවට ගත් ප්‍රධාන සැකකාරිය වන ඉෂාරා සෙව්වන්දි නැමැත්තියට මෙරටින් පලායාමට උදව් උපකාර කළ පුද්ගලයන් පස්දෙනකු අත්අඩංගුවට ගත් බව කොළඹ අපරාධ කොට්ඨාසය කියයි.

ඒ අතර ඇය රැඳී සිටි බව කියන කිලිනොච්චිය නිවසේ හිමිකරු , සැකකාරියට පලායාම සඳහා සංවිධානය කළ පුද්ගලයා මෙන්ම බෝට්ටුව සැපයූ පුද්ගලයාද වන බව පොලිසිය කියයි.

මේ වන විට ඉෂාරා සෙව්වන් දී නැමැත්තියට නවාතැන් පහසුකම් ලබාදීම මෙරටින් පලායාම  සඳහා ආධාර අනුබල දුන් බව කියන පොලිස් කොස්තාපල්වරයෙක් ඇතුළු නව දෙනකු පොලිසිය මගින් අත්අඩංගුවට ගෙන ඇත.

ඉකුත් පෙබරවාරි මස 19 වෙනිදින  කනේ මුල්ල සංජීව නමැත්තා අලුත් කඩේ අධිකරණ සංකීර්ණය තුළදී ඝාතනය කිරීමෙන් අනතුරුව දොඩංගොඩ සහ මිද්දෙණිය ප්‍රදේශවල රැඳී සිටි සැකකාරිය ඉකුත් මැයි 6 පළාත් පාලන මැතිවරණ දිනයේදී  යාපනය බලා පලා ගොස් තිබිණි.

 සැකකාරියට ඉන්දියාවට පලායාම සඳහා  බෝට්ටුව සැපයූ පුද්ගලයා ඒ වෙනුවෙන් රුපියල් ලක්ෂ 25 ක මුදලක් ලබා දි ඇතැයිද පොලිස් විමර්ශනවලදී අනාවරණය වී ඇත.

ඉෂාරා සෙව්වන්දි නැමැත්තියට ඉන්දියාවට පලායාමේදී  ඇයගේ සහායට තරුණයන් තිදෙනෙකුද බෝට්ටුව සැපයූ පුද්ගලයා යොදවා ඇතිවී ඇතැයි ද විමර්ශනවලදී වැඩිදුරටත් අනාවරණය වී ඇත.