හිටපු ජනාධිපති රනිල් වික්‍රමසිංහ මහතාගේ ඇප අවලංගු කිරීමට තරම් ප්‍රබල කරුණක් ඉදිරිපත්ව නොමැති බව කොළඹ කොටුව මහේස්ත්‍රාත් ඉසුරු නෙත්ති කුමාර මහතා අද පැවසීය.

හිටපු ජනපති රනිල් වික්‍රමසිංහ මහතා ට පොදු දේපොළ පනත යටතේ ගොනුකර ඇති නඩුව කැඳවූ අවස්ථාවේදී මෙම කරුණු ඉදිරිපත් කළ අතර  ජනවාරි 28වනදා යළි කැඳවීමට දින නියම කළේය.

වික්‍රමසිංහ මහතාට ඇප ලබා ගැනීමට ඉදිරිපත් කර ඇති වෛද්‍ය වාර්තා ඇප ලබා ගැනීමට පමණක් ඉදිරිපත් කර ඇති බවත්,එමගින් අධිකරණය නොමැග යෑවීමට උත්සාහ දරා ඇති බැවින් ඇප අවලංගු කරන ලෙසට  ඉදිරිපත් වූ කරුණු සලකා බැලීමෙන් පසුව එසේ පැවසීය.

  රනිල් වික්‍රමසිංහ මහතා අධිකරණය පෙනී සිටීමෙන් අනතුරුව දෙපාර්ශවය ඉදිරිපත් කළ කරුණු සලකා බැලූ  කොළඹ කොටුව මහෙස්ත්‍රාත් ඉසුරු නෙත්ති කුමාර මහතා  රනිල් වික්‍රමසිංහ මහතා අදාළ විමර්ශනය කඩිනමින් අවසන් කර ඊට සම්බන්ධ  සැකකරුවන් සිටි නම් අධිකරණයට ඉදිරිපත් කරන  ලෙසට රහස් පොලිසියට නියෝග කළේය.

එමෙන්ම පසුගිය නඩු  දිනයේදී අධිකරණය ආශ්‍රිතව සිදුවූ සිදුවීම්වලින් අධිකරණයට අපහාසයක් සිදු වී තිබේදැයි විමර්ශන සිදුකර ඊට වගකිව යුතු පුද්ගලයින් කවුරුන්ද, ඔවුන් සම්බන්ධයෙන් ගනු ලබන ක්‍රියාමාර්ග කවරේද යන්න පිළිබඳව මීළඟ නඩු දිනයේදී අධිකරණයට දැනුම්දෙන ලෙසත් මහෙස්ත්‍රාත්වරයා අපරාධ පරීක්ෂණ දෙපාර්තමේන්තුවට නියම කළේය.

ඉන් අනතුරුව අදාළ නඩුව 2026 වසරේ ජනවාරි 28 වනදා කැඳවීමට ද නියම විය.

(ඡායාරූප: ඉසුරු පෙරේරා)