(ජේ .  ඒ  .එල්  .ජයසිංහ සහ ෂේන් සෙනවිරත්න)

මහනුවර දිස්ත්‍රික් ලේකම් කාර්යාල පරිශ්‍රයේ බෝම්බයක් ඇතැයි  කිසියම්  අයෙකු ලබා දුන්  තොරතුරක් මත  මහනුවර පොලීසියේ  නිලධාරින් කණ්ඩායමක්  ,සහ  යුද හමුදා  බෝම්බ නිශ්ක්‍රීය අංශයේ   නිලධාරින් කණ්ඩායමක්  ,නිල සුනඛයන්ද යොදවා  දිස්ත්‍රික් ලේකම් කාර්යාලය  සම්පූර්ණ සෝදිසියකට  ලක්  කිරීමේ මෙහෙයුමක්  අද පෙරවරුවේ සිදු කළහ.

මේ සම්බන්ධව මහනුවර පොලිස් මූලස්ථානයේ වැඩ බලන පොලිස් මූලස්ථානාධිපති ප්‍රධාන පොලිස් පරීක්ෂක එම් .බී .ගන්නෑව මහතාගෙන් විමසීමේදී  ,බෝම්බයක්  ඇතිබවට ලද  , තොරතුර මත  මහනුවර දිස්ත්‍රික් ලේකම් කාර්යල පරිශ්‍රය  යුද හමුදාව සහ පොලීසිය මෙන්ම බෝම්බ සම්බන්ධව  විශේෂයෙන් පුහුණු කරනලද  නිල සුනඛයන්ද යොදවා පරීක්ෂා කල බවත් ,බෝම්බයක් හෝ පුපුරණ ද්‍රව්‍යයක් හමු නොවූ බවත්   පැවසීය.

කෙසේ වෙතත්  අවශ්‍ය ආරක්ෂාව යොදවා    ලැබුණු සිද්ධිය පිළිබඳව  වැඩිදුර  පරීක්ෂණ  ආරම්භ කර ඇති බවත් ,මහනුවර වැඩ බලන පොලිස් මූලස්ථානාධිපති වරයා  වැඩි දුරටත් කීය.