(සුජිත් හේවාජුලිගේ සහ  අංජුල මහික වීරරත්න)

බීඩි බලපත්‍ර තුන්සීයක් තවමත් අලුත් කර නැතැයි  සුරාබදු දෙපාර්තමේන්තුවේ නිලධාරීහු  රජයේ මුදල් පිළිබඳ පාර්ලිමේන්තු කාරක සභාවට  දැනුම් දුන්හ.

ගිය වසරේ බීඩි බලපත්‍ර 1140ක් නිකුත් කර ඇතැයිද ඹවුහු පැවැසූහ.

මේ අතර ශ්‍රී ලංකාවේ නිෂ්පාදනය කරන සෑම බීඩි වර්ගයක් සඳහාම අය කරන දුම්කොළ බද්ද මෙම වසරේ අප්‍රේල් මස 2 වැනි දා සිට බලපැවැත්වෙන පරිදි රුපියල් දෙකේ සිට රුපියල් තුන දක්වා වැඩි කිරීමට අදාළ ගැසට් නිවේදනය රජයේ මුදල් පිළිබඳ පාර්ලිමේන්තු කාරක සභාව අනුමත කළේය.

රජයේ මුදල් පිළිබඳ පාර්ලිමේන්තු කාරක සභාව එහි සභාපති පාර්ලිමේන්තු මන්ත්‍රී ආචාර්ය හර්ෂ ද සිල්වා මහතාගේ ප්‍රධානත්වයෙන් පාර්ලිමේන්තු සංකීර්ණයේදී පසුගිය 22 වැනිදා රැස්විය. මෙම අනුමත කිරීම කර ඇත්තේ එම රැස්වීමේදීය.

බීඩි නිෂ්පාදනයෙන් පසුගිය වසරේදී  රුපියල් කෝටි දෙසීයක ආදායමක් අපේක්ෂා කළද ලැබී ඇත්තේ රුපියල් කෝටි එකසිය පහක් පමණක් බව එම කමිටුවේදී තොරතුරු අනාවරණය විය.

බීඩි නිෂ්පාදනයෙන්  මේ වසරේ මේ දක්වා රැස් කර ඇත්තේ රුපියල් කෝටි හතළිස් හතකට ආසන්න මුදලක් පමණක් බව  පැවසේ.

මහා පරිමාණ අනීතික බීඩි ජාවාරම  සඳහා ප්‍රමාණවත් නෛතික ක්‍රියාමාර්ග නොගැනීම මෙම අඩුපාඩු ඇතිවීමට හේතුව බව සුරාබදු කොමසාරිස්  ජනරාල්වරයා  මුදල් කාරක සභාවට  දැනුම් දුන්නේය.