(සුමිත් පොතුපිටිය)

බ්‍රිතාන්‍ය  ජාතික අඹුසැමි  යුවලකගේ විදෙස් ගමන් බලපත් දෙකක්, මුදල් ඇතුළු රුපියල් ලක්ෂ 40 කට ආසන්න වටිනාකමකින් යුත් භාණ්ඩ සොරකම් කල සැකකරුව පැමිණිල්ල ලැබී පැය 24 ක් ගතවන්නට මත්තෙන්  අත්අඩංගුවට අද (07) ගත්බව කළුතර උතුර පොලිසිය පවසයි.  

මෙසේ අත්අඩංගුවට ගෙන ඇත්තේ වස්කඩුව ප්‍රදේශයේ පදිංචි 26  හැවිරිදි පුද්ගලයකු බව පොලිසිය කීය.

සැකකරුගෙන් කරන ලද ප්‍රශ්න කිරීමේදී වැටකෙය්යා පදුරක් අස්සේ සගවා තිබූ විදෙස් ගමන් බලපත් දෙක, වීසා බලපත්, බැංකු කාඩ්, කැමරාවක් සහ රන් සහ රිදී ආභරණ සොයාගත් බව පොලිසිය  කීය.

සැකකරු තවත් පුද්ගලයකු සමග එක්ව බ්‍රිතාන්‍ය යුවලගේ මුදල් සහ භාණ්ඩ  බහාතිබූ සේප්පුව සොරකම් කර හිස් සේප්පුව මුහුදට විසිකර ඇති බවට ප්‍රකාශ ලබාදී ඇතැයි පොලිසිය කීය.

අනෙක් සැකකරු ප්‍රදේශයේ විදේශිකයන්ට ජුවලරි භාණ්ඩ අලෙවි කරන වෙළද සැලක කාන්තාවකගෙන් ස්ටර්ලිං පවුම් මාරුකර ගෙන ප්‍රදේශයෙන් පලාගොස් සිටින බවත්,ඔහු සොයා පරීක්ෂණ අකණ්ඩව සිදුකරන බවත් වැටලීමට එක්වූ නිළධාරීයෙක් කීය.

සැකකරු කළුතර මහේස්ත්‍රාත් අධිකරණයට ඉදිරිපත් කිරීමට නියමිතව තිබුණි .

ජේෂ්ඨ පොලිස් අධිකාරී කපිල ප්‍රේමදාස, සහකාර පොලිස් අධිකාරී දුමින්ද රාජපක්ෂ සහ ස්ථානාධිපති ප්‍රධාන පොලිස් පරීක්ෂක දමිත් ජයතිලක මහතා ගේ උපදෙස් පරිදි විවිධ පැමිණිලි අංශ ස්ථානාධිපති  පොලිස් පරීක්ෂක ලක්ෂිත වීරසිංහ සහ අපරාධ අංශ ස්ථානාධිපති උප පොලිස් පරීක්ෂක ඉන්ද්‍රජිත් ,සැරයන් මනෝජ් (5778) සහ කොස්තාපල් තිලකරත්න (94014) යන නිළධාරීන් වැටලීමට එක්වූහ .