ආපදා තත්ත්වය හමුවේ පේරාදෙණිය විශ්ව විද්‍යාලයේ සියලුම සිසුන්ගේ ආරක්ෂාව තහවුරු කළ බවත්, විශ්ව විද්‍යාලයේ අධ්‍යාපන කටයුතු ලබන දෙසැම්බර් 7 වැනිදා තෙක් අත්හිටුවා ඇති බවත්, විශ්ව විද්‍යාලයේ උප කුලපති මහාචාර්ය ටෙරන්ස් මධුජිත් මහතා විශේෂ නිවේදනයක් නිකුත් කරමින් පවසයි.

ආපදා තත්ත්වයට මුහුණ දෙද්දී, විශ්වවිද්‍යාලයේ නේවාසිකාගාර 22 ක සිසුන් 10,000 කට ආසන්න සංඛ්‍යාවක් රැදී සිටි බවත්, තවත් සිසුහු දහස් ගණනක් බාහිර නේවාසික ස්ථානවල රැදී සිටි බවත් උප කුලපති මහාචාර්ය මධුජිත් මහතාගේ නිවේදනයේ සඳහන් වෙයි.

ඊයේ (30) දිනය වෙද්දී, කාලගුණය යහපත් අතට හැරීමත් සමඟ, බොහෝ නේවාසික සිසුන් විශ්වවිද්‍යාලයෙන් පිටව යනු ඇති බවත්, ගමන් කිරීම ආරක්ෂිත නම් පමණක් නිවෙස් බලා යන ලෙස එම සිසුන්ට උපදෙස් දී ඇති බවත් උපකුලපතිවරයා පෙන්වා දී ඇත. ප්‍රාදේශීය ලේකම් කාර්යාලයේ දසහාය ඇතිව, සිසුන්ට විශ්වවිද්‍යාල භූමියෙන් පිටවීම පහසු කිරීම සඳහා බස් රථ කිහිපයක් යෙදවිණි.

විශ්ව විද්‍යාලයේ සියලු කටයුතු පසුගිය 28 වැනිදා අත්හිටුවීමට උපකුලපතිවරයා නියෝග කර අතර, මේ වනවිට රාජකාරිය සඳහා වාර්තා කළ යුතු වන්නේ අත්‍යවශ්‍ය කාර්ය මණ්ඩලය පමණි.

පසුගිය 27 වැනිදා වනවිට මහවැලි ගංගාව ආසන්නයේ නේවාසිකාගාර හතරක් අධි අවදානම් ස්ථාන ලෙස කල්තියා හඳුනාගෙන, එම නේවාසිකාගාරවල සිටි සියලුම සිසුන් ආරක්ෂිත නේවාසිකාගාර වෙත මාරු කළ බවත්, ඉඩකඩ සම්බන්ධයෙන් ගැටලු මතුවීම හේතුවෙන්, ඇතුම් සිසුන් දේශන ශාලාවේ රැඳවීමට කටයුතු කළ බවත්, අසල බෝඩිම්වල සිටි සිසුන් කිහිප දෙනකු ද වැඩි ආරක්ෂාව සැලකිල්ලට ගනිමින් විශ්වවිද්‍යාල භූමියට ගෙන ආ බවත්, ඊට අමතරව අවට නවාතැන්ගෙන සිටි විශ්ව විද්‍යාල සිසුන් කිහිප දෙනකු ද ඔවුන්ගේ ආරක්ෂාව ගැන සිතා විශ්ව විද්‍යාල පරිශ්‍රයට ගෙන්වා ගැනීමට පියවර ගත් බවත් මහාචාර්ය මධුජිත් මහතා සිය නිවේදනය ඔස්සේ පැහැදිලි කර ඇත.

මහාචාර්ය මධුජිත් මහතාගේ නිවේදනයේ මෙසේ ද සඳහන් වෙයි.

“27 වැනිදා සවස සිට 28 වන දින දහවල් වන තුරු, මහවැලි ගඟ පිටාර ගැලීම හේතුවෙන් විශ්වවිද්‍යාලය දැඩි ගංවතුර තත්ත්වයකට මුහුණ දුන්නා. විශ්ව විද්‍යාලයේ ස්ථාන කීපයක් ජලයෙන් යටවුණා.

ගොඩනැගිලි කිහිපයකට, ක්‍රීඩා පිටි සහ ව්‍යායාම ශාලාවට දැඩි ලෙස හානි වුණා. ඒ වගේමයි විදුලිය බිඳ වැටුණු අතර, පානීය ජල පහසුකම් මෙන්ම දුරකථන සේවා සම්පූර්ණයෙන්ම අඩපණ වුණා.

මුලදී, නේවාසිකාගාර ආපනශාලාවල ප්‍රමාණවත් ආහාර තිබුණු බැවින් සිසුන්ට ආහාර ලබා දීම දිගටම සිදුවෙමින් පැවැතිණි.

කෙසේ නමුත්, 29 වන දින උදෑසන වන විට, පානීය ජල හිඟය හේතුවෙන් ආපනශාලාවලට ආහාර සකස් කිරීම ගැටලුවක් වුණා. මහනුවර දිස්ත්‍රික් ලේකම් කාර්යාලයේ සහාය ඇතිව නේවාසිකාගාර වෙත පමණක් නොවෙයි, මුළු විශ්ව විද්‍යාලයටම කඩිනමින් ජලය ලබා දීම ආරම්භ කළත්, 29 වැනිදා සවස් වනවිට ජල සැපයුම යළි අඩපණ වුණා. ඒ, විදුලිය බිඳ වැටීමක් හේතුවෙන් පොම්පාගාරයේ කටයුතු නැවතුණු නිසයි.‍

මේ කාලසීමාව ඇතුළත ශ්‍රී ලංකා යුද හමුදාව, ශ්‍රී දළදා මාලිගාව සහ මහමෙව්නාව පදනම සිසුන් කිසිදු ආකාරයකින් අපහසුතාවකට පත් නොකර, දහස් ගණනක් ආහාර පාර්සල් බෙදා දීමට කටයුතු කළා. ජල සැපයුම යළි යථා තත්ත්වයට පත් කිරීමත් සමඟ විශ්වවිද්‍යාල ආපනශාලා ක්‍රියාකරුවන්ට සුපුරුදු පරිදි ආහාර පිළියෙල කිරීමට හැකියාව ලැබුණා. ආපදාවට මුහුණ දුන් කාලයේ සිසුන් කිසිවකුට කිසිදු අඩුපාඩුවක් නොකර ඔවුන් රැක බලා ගන්න විශ්ව විද්‍යාල කාර්ය මණ්ඩලයට හැකියාව ලැබුණා.”

(විශ්ව විද්‍යාලය ජලයෙන් යටව තිබූ අයුරු)