(ෂේන් සෙනෙවිරත්න සහ ජේ.ඒ.එල් ජයසිංහ)

ඉහළකෝට්ටේ දුම්රිය මාර්ගයේදී මහනුවර කොළඹ නගරාන්තර සීඝ්‍රග්‍රාමී දුම්රිය පීලි පැනීම සහ නාය යාම  හේතුවෙන් අවහිර වූ දුම්රිය මාර්ගය යථා තත්වයට පත් කිරීමට යුද හමුදා සහාය ගත් බව දුම්රිය දෙපාර්තමේන්තුව කියයි. 

නයාම හේතුවෙන් දින තුනක කාලයකට උඩරට මාර්ගයේ දුම්රිය ගමන් වාර 42 ක් අවලංගු කළ බව දුම්රිය දෙපාර්තමේන්තුව කියයි.

පීලි පැනීමට ලක්වූ මහනුවර කොළඹ නගරාන්තර ශීඝ්‍රගාමී දුම්රිය මේ වන විට එම ස්ථානයෙන් ඉවත්කොට ඇති බවත් දුම්රිය මාර්ගයේ ස්ථාන කිහිපයකින් නාය යාමට ලක්වූ ස්ථාන පිළිසකර කිරීමේ කටයුතු මේ වනවිට ආරම්භ කොට ඇති බවද එම දෙපාර්තමේන්තුව කියයි.

පවතින අයහපත් කාලගුණය හමුවේ එම පිළිසකර කටයුතු අවසන් වන නිශ්චිත දිනයක් ප්‍රකාශ කළ නොහැකි බවත් දුම්රිය මාර්ගයට ඉහළින් ඇති අලගල්ල පර්වතයේ සිට විශාල ජල ධාරාවන් දුම්රිය මාර්ගයට පතිත වීම හේතුවෙන් පිළිසකර කටයුතුවලට බාධා පැමිණෙමින් තිබෙන බවද කියයි.