(විමුක්ති එස් රුද්‍රිගු)

මෙරටට ලබාදී ඇති අරමුදල් වැඩසටහන ක්‍රියාත්මක කිරීමෙහිලා ශ්‍රී ලංකාව ලබාගෙන ඇති ප්‍රගතිය මැන බැලීම සඳහා සිදුකළ පස්වැනි සමාලෝචනය පිළිබඳ සාකච්ඡා කර අනුමැතිය ලබාදීම සඳහා විධායක කමිටුව එළැඹෙන 15 වැනිදා රැස්වීමට නියමිත බව ජාත්‍යන්තර මූල්‍ය අරමුදල පසුගියදා ප්‍රකාශ කළේය.

පස්වැනි සමාලෝචනය පිළිබඳව ශ්‍රී ලංකාව සහ ජාත්‍යන්තර මූල්‍ය අරමුදල, කාර්ය මණ්ඩල එකඟතාවයකට පසුගිය ඔක්තෝබර් මාසය මුලදී එළැඹියේය. ඒ සඳහා පසුගිය සැප්තැම්බර් මස 24 වැනිදා ජාත්‍යන්තර මූල්‍ය අරමුදලේ නියෝජිත පිරිසක් මෙරටට පැමිණියේය.

ජාත්‍යන්තර මූල්‍ය අරමුදලේ ශ්‍රී ලංකා මෙහෙයුම් ප්‍රධානී එවන් පැපජෝර්ජියෝ මහතා මීට පෙර අවස්ථාවකදී ප්‍රකාශ කර සිටියේ එක් පූර්ව ක්‍රියාවක් සම්පූර්ණ කිරීමෙන් පසුව පස්වැනි සමාලෝචනය විධායක කමිටුවේ අනුමැතිය සඳහා යොමු කරනු ඇති බවත් ලබන වසරේ අයවැය ජාත්‍යන්තර මූල්‍ය අරමුදල මෙරටට ලබාදී ඇති අරමුදල් වැඩසටහනේ කොන්දේසි වලට අනුව සකස් කිරීම එම පූර්ව ක්‍රියාව බවත්ය.

එහිදී ලබන වසරේ අයවැයේ කරුණු කීපයක් පිළිබඳව ජාත්‍යන්තර මූල්‍ය අරමුදල අවධානය යොමු කරනු ඇති බවත් ඒ අතර රජයේ වියදම, ප්‍රථමික ගිණුමේ අතිරික්තය, රාජ්‍ය ව්‍යවසාය ප්‍රතිසංස්කරණ තිබෙන බවත් ඔහු පැවැසුවේය.

ඉන් පසුව අරමුදලේ සන්නිවේදන දෙපාර්තමේන්තුවේ අධ්‍යක්‍ෂිකා ජුලී කොසැක් මහත්මිය පසුගියදා පැවැති මාධ්‍ය හමුවකදී ප්‍රකාශ කර සිටියේ පසුගියදා පාර්ලිමේන්තුවට ඉදිරිපත් කෙරුණු 2026 අයවැය ජාත්‍යන්තර මූල්‍ය අරමුදල මෙරටට ලබාදී ඇති අරමුදල් වැඩසටහනේ කැපවීම්වලට අනුකූලව සකස් වී ඇත්දැයි ඇස්තමේන්තු කිරීම සඳහා ප්‍රකාශයට පත්කර ඇති අයවැය ලියකියවිලි ජාත්‍යන්තර මූල්‍ය අරමුදලේ කාර්ය මණ්ඩලය සමාලෝචනය කරමින් සිටින බවය.එම ඇස්තමේන්තුව පස්වැනි සමාලෝචනයේ වැදගත් කොටසක් වනු ඇතැයිද ඇය පැවැසුවාය.

ලබන වසරේ අයවැය පාර්ලිමේන්තුවට ඉදිරිපත් වී අවසන් බැවින් ඒ අනුව එළැඹෙන 15 වැනිදා පස්වැනි සමාලෝචනය පිළිබඳ සාකච්ඡා කර අනුමැතිය ලබාදීම සඳහා ජාත්‍යන්තර මූල්‍ය අරමුදලේ විධායක කමිටුව රැස්වීමට නියමිතය.

පස්වැනි සමාලෝචනයට ජාත්‍යන්තර මූල්‍ය අරමුදලේ විධායක කමිටුවේ අනුමැතිය ලැබුණු පසු ශ්‍රී ලංකාවට තවත් ඇමෙරිකානු ඩොලර් මිලියන 347 ක මුදලක් සයවැනි වාරිකය ලෙස ලැබෙනු ඇති අතර ඒ සමග ජාත්‍යන්තර මූල්‍ය අරමුදල ශ්‍රී ලංකාවට නිදහස් කර ඇති මුදල් ප්‍රමාණය ඇමෙරිකානු ඩොලර් බිලියන 2 ඉක්මවා යනු ඇත.