(ගයාන් සූරිය ආරච්චි)

මෙරට ආන්දෝලනයට තුඩු දුන් ඝාතනයන් හා අපරාධවලට සම්බන්ධ පුද්ගලයන් සොයා ගැනීමට නොහැකිවී ඇත්තේ පොලිසියේ අවශ්‍යතාවක් හෝ කැපවීමක් නොමැති වීම නිසා නොව සෑම සිදුවීමක් තුළම දේශපාලන හස්තයක් තිබීම නිසා බව ජනාධිපති අනුව කුමාර දිසානායක මහතා පැවසීය.

ඔහු මේ බව පැවසූවේ බම්බලපිටිය ක්ෂේත්‍ර බළකා මූලස්ථානයේ ඊයේ (3) පැවති 159 වැනි පොලිස් දින සැමරුම් උළෙලේදීය.

එකල සිටි දේශපාලඥයන් එම විමර්ශන අඩපණ කළ බවත් නිවැරදිව රාජකාරී කළ නිලධාරීන්ගෙන් පළිගැනීමේ ඉතිහාසයක් තිබුණු බවත් ජනාධිපතිවරයා පැවසීය.

මෑත කාලයේදී කොතැනක හෝ වෙඩි තැබීමක් සිදුවුවද එම අපරාධකරුවන් හඹාගෙන ගොස් අත්අඩංගුවට ගැනීමට අපේ පොලිසියට හැකි වී තිබෙන බවද ජනාධිපතිවරයා අවධාරණය කළේය.

රජයක් හැටියට වර්තමානයේ තිබෙන මිනිස් අවශ්‍යතා හා අභියෝග හමුවේ පොලිස් නිලධාරීන්ට වැටුප් ප්‍රමාණවත් නොවන බව දන්නා අතර ඒ සඳහා යම් වැටුප් වැඩි කිරීමක් කිරීමට බලාපොරොත්තු වන බවත් එය අදියර කීපයකින් වැඩි කිරීමට බලාපොරොත්තු වන බවද ජනාධිපතිවරයා පැවසීය.

ඡායාරූප ජයමාල් චන්ද්‍රසිරි