(විනීතා එම්  ගමගේ)

රට හදන්නට මිනිසුන් හද හදා සිටින්නට වෙලාවක් නැති බැවින් හැදිච්ච මිනිසුන් සමඟ රට පෙරට ගෙන යන්නට ජනාධිපතිවරයා  කටයුතු කළ යුතු යැයි දේශය සුරැකිමේ ජාතික ව්‍යාපාරයේ සභාපති ඇල්ලේ ගුණවංශ හිමියෝ පැවසූහ.

ජාත්‍යන්තර සම්මුති දෙස බලා ඒවා නිවැරදි කරගන්නට කටයුතු කළ යුතු නමුත් මේ රට සිංගප්පූරුවක් හෝ මැලේසියාවක් කළ යුතු නැති බවත් රට අපේ රට ලෙසම අපේ ආරෙට සංවර්ධනය කළා නම් ප‍්‍රමාණවත් වන්නේ යැයි ද උන්වහන්සේ පැවැසූහ.

බඩු මිල ටිකක් අඩු කරන්නට හැකිනම් අගනේ යැයි කී ගුණවංශ හිමියෝ ජනතාව ජනාධිපතිතුමන් ගැන තැබූ විශ්වාසය නොබිඳිනු ඇතැයි විශ්වාස කරන බව ද කියාසිටියහ.

ශ්‍රී ලංකා පදනම් ආයතනයේ අද (24) පැවති යුතුකම සංවාද කේන්ද්‍රයේ මාධ්‍ය හමුවක දී අදහස් දැක්වූ උන්වහන්සේ මහ මැතිවරණයත් ළඟ එන බැවින් ජනතාවට සහන දී ජනතාව දිනාගැනීම ජනාධිපතිවරයා අතේ ඇතැයි ද පැවසූහ.

අමාත්‍යංශ්‍ය ලැබුණේ යැයි කියා එහි වාහන සියල්ල රැගෙන හත්මුතු පරම්පරාවම දමාගෙන යන්නට සූදානම් නොවන්නැයි ඇමැති මණ්ඩලයෙන් ඉල්ලා සිටින බවද ඒ පිළිබඳව තමන් අවධානයෙන් සිටින බවද ජනතාව මේ සියල්ල දෙස සියුම්ව බලා සිටින බවද ගුණවංශ හිමියෝ කීහ.

දේශපාලඥයන් පරිත්‍යාග කළ යුතු බව ද මේ තාවකාලික ආණ්ඩුවේ කාර්යාල ගැනීම්, වාහන ගැනීම් නොකර ආදර්ශයක් දෙන්නට ඔවුන් සූදානම් විය යුතු බව ද කී උන්වහන්සේ කලින් ජනාධිපතිවරයා ගමනක් යන විට වාහන 17 ක් ගිය බවත් ගිනි නිවන රථයක් හා ගිලන් රථයක් ද ඒ සමඟ යනු දුටු තමන් එහි අඩු හරස් එකක් හා හාමුදුරුවරු කෙනෙක් පමණක් යැයි සිතූ බව ද පැවසූහ.

එසේ බලනවිට මේ ජනාධිපතිවරයා පත්කර ගැනීම ගැන ජනතාවට පින් දෙන්නේ යැයි පැවසූ ගුණවංශ හිමියෝ එෆ්සීඅයිඩීය වැනි අනවශ්‍ය ආයතන ඉවත්කර එයින් කරන කටයුතු අපරාධ පරික්ෂණ දෙපාර්තමේන්තුවට බාර දීමට කටයුතු කරනු ඇතැයි තමන් බලාපොරොත්තු වන බව ද පැවැසූහ.

දේශපාලඥයින් ගත් වැරදි තීරණ නිසා දක්ෂ පරිපාලන නිලධාරියකු වන ලලිත් වීරතුංග මහතා වැනි නිලධාරින් දුක් විඳින බවත් ඒවා ගැන සොයා බැලිය යුතු බවත් උන්වහන්සේ තවදුරටත් පැවසූහ.

මෙම මාධ්‍ය හමුව ඇමතූ යුතුකම සංවාද කේන්ද්‍රයේ සභාපති ගෙවිඳු කුමාරතුංග මහතා මෙවර මැතිවරණයේ දී සිදුවූයේ 2015 පත් වූ ආණ්ඩුව ආරම්භයේ සිටම කළ ක‍්‍රියාවන් පරාජය කිරීමක් යැයි කියා සිටියේය.

ජනතාව මෙවර ඡන්දය දුන්නේ වෙන කිසිවක් ගැන සිතා නොව රට ගැන සිතා පමණකැයි ද එය විජාතිකත්වයට එරෙහි ස්වදේශීකත්වය වෙනුවෙන් වූ ඡන්දයක් යැයි ද පැවසූ කුමාරතුංග මහතා එය කප්පම් නොදෙන දේශපාලනයක් වෙනුවෙන් වූ ඡන්දයක් යැයි ද කියා සිටියේය.

30 අවුරුදු යුද්ධයක් පරාජය කළ රටකට රාජ්‍ය ආරක්ෂාව වෙනුවෙන් ප‍්‍රබල රාජ්‍ය ව්‍යුහයක් අවශ්‍ය වන්නේ යැයි ද ඒ වෙනුවෙන් දුන් ජන වරමින් පෙනී යන්නේ මහින්ද රාජපක්ෂ හා ගෝඨාභය රාජපක්ෂ යන මහත්වරු ඉදිරිපත් කළ යෝජනා ජනතාව පිළිගත් බව යැයි ද හෙතෙම සඳහන් කළේය.

එහි දී මාධ්‍යවේදියෙක් නැගූ ප‍්‍රශ්නයකට පිළිතුරු දුන් කුමාරතුංග මහතා තමන්ට නව රජයෙන් උතුරු මැද පළාත් ආණ්ඩුකාරකම බාරගන්නා ලෙස ඇරයුම් ලැබුණු නමුත් එය බාර නොගත් බවත් එවැනි තනතුරක් ගතහොත් එයට පූර්ණ කාලීනව කැපවිය යුතු බැවින් ද තමන් යුතුකම සංවාද කේන්ද්‍රය වෙනුවෙන් පූර්ණකාලීනව වැඩ කරන බැවින් එයට කැපවිය නොහැකි බැවින් ද එම තනතුර බාර නොගත් බව කීය.