සුරාට් අධිකරණයේ ගොනු කර තිබූ සාපරාධි අපහාස නඩුවට වරදකරු යැයි තීන්දු කරමින් එම අධිකරණය ලබා දුන් නියෝගයට එරෙහිව කොංග්‍රස් පක්ෂ ප්‍රධානී රාහුල් ගාන්ධි අද (3) ගුජරාට් අධිකරණය හමුවේ අභියාචනයක් ගොනු කළේය.

“හොරු සියලු දෙනාට පොදුවේ මෝදි නාමය තිබෙන්නේ කෙසේදැයි” මැතිවරණ රැළියකදී රාහුල් ගාන්ධි කළ ප්‍රකාශයක් හේතුවෙන් 2019 වසරේදී ගුජරාත් අමාත්‍ය පුර්නේෂ් මෝදි විසින් මෙම සාපරාධි අපහාස නඩුව ගොනු කර තිබිණ.

එම නඩුව විභාගයට ගනිමින් රාහුල් ගාන්ධි අග්‍රාමාත්‍ය නරේන්ද්‍ර මෝදිට අපහාස කර ඇති බව තීන්දු කළ සුරාට් අධිකරණය වසර දෙකක සිර දඬුවමක් නියම කරමින් එය දින 30 කාලයක් අත් හිටුවා ඇප ලබා දුන්නේය.ඔහුට අභියාචනා කිරීමට අවස්ථාව ලබා දීම සඳහා මෙසේ දඬුවම දවස් 30 ක කාලයක් අත්හිටුවන ලදී.

රාහුල් ගාන්ධිගේ සොයුරිය ප්‍රියංකා ගාන්ධි, කොංග්‍රස් පක්ෂය පාලනය කරනු ලබන ප්‍රාන්ත තුනේ මහ ඇමතිවරු රාහුල් ගාන්ධි සමඟ අභියාචනාධිකරණයට පැමිණ සිටියහ.

එහිදී ගුජරාත් අධිකරණය අභියාචනය විභාග කර අවසන් වන තෙක් වසර දෙකක සිර දඬුවම අත්හිටවමින් ඇප ලබා දෙන ලදි.එළඹෙන 13 වැනිදා අභියාචනය විභාග කිරීමට නියමිතය.

වසර දෙකක සිර දඬුවම ලබා දීම අත් හිටවූවත් අභියාචනය විභාග කිරීමෙන් අනතුරුව ගුජරාත් අධිකරණය රාහුල් ගාන්ධිව නිදොස් කොට නිදහස් නොකොළහොත් ඔහුගේ අහෝසි කරන ලද මන්ත්‍රී ධුරය නැවත නොලැබෙන බව ඉන්දීය මාධ්‍ය වාර්තා කළේය.