(සුජිත් හේවාජුලිගේ සහ අංජුල මහික වීරරත්න )

මහා පරිමාණ ඇඟලුම් කර්මාන්ත මෙන්ම සුළු හා මධ්‍ය පරිමාණ කර්මාන්තකරුවන්ට රජය සහන නොසැලසීම නිසා ඒවා වැසී ගොස් ලක්ෂ සංඛ්‍යාත පිරිසකගේ රැකියා අහිමිවීමේ අවදානමක් මතුව ඇතැයි විපක්ෂ නායක සජිත් ප්‍රේමදාස මහතා පැවසීය.

මහා පරිමාණ ඇඟලුම් කම්හල් කිහිපයක්ම දැනටමත් වැසී ගොස් ඇතැයිද ඔහු සඳහන් කළේය.

විපක්ෂ නායකවරයා මෙසේ පැවසුවේ ස්ථාවර නියෝග 27(2) යටතේ ප්‍රශ්නයක් මතු කරමිනි.

විපක්ෂ නායකවරයා මෙසේ ද සඳහන් කළේය.

සුළු හා මධ්‍ය පරිමාණ කර්මාන්ත හෝටල් මෙරට දේශීය ඇඳුම් ආයතන වැසී යාමේ අවදානමක් පවතිනවා. නිමි ඇඳුම් ආනයනයට ඉඩ ප්‍රස්ථාව සැලසීම නිසා දේශීය ඇඟලුම් කර්මාන්තයට මරු පහරක් එල්ල වී තිබෙනවා. සුළු හා මධ්‍ය පරිමාණ කර්මාන්තකරුවන්ගේ ණය පොලී අනුපාතය පහත හෙළීමට කටයුතු කරන්නේද?. එම ව්‍යාපාරිකයන් ලබාගෙන ඇති ණය යම් ප්‍රමාණයක් කපා හැරීමට අවස්ථාවක් තිබේද? ධනපතියන්ගේ බොල් ණය කපා හරින වෙලාවක ඒ අයට සහන දෙන්න බැරි ඇයි? ණය සියයට 30 කින් කපා හරින්න කියලා ඉල්ලනවා. ඒ අය වෙනුවෙන් ණය සහන වැඩපිළිවෙළක් ක්‍රියාත්මක කරන්න. රජය මේ පිරිස සම්බන්ධයෙන් යොමු කර ඇති අවධානය ප්‍රමාණවත් නෑ.

මේක ජාතික වැදගත්කමකින් යුතු ප්‍රශ්නයක්. අපි රජයෙන් මේ ප්‍රශ්නයට ඉක්මන් පිළිතුරු බලාපොරොත්තු වෙනවා. ඇඟලුම් කම්හල් කියන්නේ මේ රටට විදේශ විනිමය ගෙන එන ආයතන. ඒ නිසා ඒ ආයතන රජයකට අමතක කරන්න බැහැ. කර්මාන්තකරුවන්ට ව්‍යාපෘති වලට ප්‍රවේශ වීමට උත්තේජකයක් ලබාදෙන්න.