(ඩයනා උදයංගනී)

වරාය නගරයට විදේශ ආයෝජකයන් ආකර්ෂණය කරගැනීම සඳහා වසර 40ක කාලයකට බදු සහන ලබාදීමට අමාත්‍ය මණ්ඩල අනුමැතිය හිමිවූ බව  කැබිනට් ප්‍රකාශක, ප්‍රවාහන, මහාමාර්ග සහ ජනමාධ්‍ය අමාත්‍ය, ආචාර්ය බන්දුල ගුණවර්ධන මහතා පැවසීය.

ලෝකයේ තරඟකාරී රටවල් විදේශ ආයෝජන ආකර්ෂණය කරගැනීම සඳහා ශ්‍රී ලංකාවට වඩා ආකර්ෂණීය සහන, වරදාන, වරප්‍රසාද ලබා දී ඇතැයි කී ඇමතිවරයා ලෝක ආර්ථික අවපාතය සමඟ ආයෝජකයන් ආකර්ෂණය කරගැනීම අසීරු ඉලක්කයක් වී ඇතැයි ද සඳහන් කළේය.

විදෙස් ආයෝජකයන් ආකර්ෂණය කරගැනීම සඳහා එම රටවලට වඩා සහන ලබාදීම රජයේ අරමුණ බව ද ගුණවර්ධන මහතා කීවේය.

අමාත්‍ය බන්දුල ගුණවර්ධන මහතා මේ බව පැවසුවේ රජයේ ප්‍රවෘත්ති දෙපාර්තමේන්තුවේදී අද (7) පැවති කැබිනට් තීරණ දැනුම්දීමේ මාධ්‍ය හමුව අමතමිනි.

ඕමානය වැනි රටවල් විවිධ කර්මාන්ත ව්‍යාපාර ආරම්භ කිරීම සඳහා විශාල බදුසහන යටතේ තම වරාය ආශ්‍රිත භූමි සම්පූර්ණයෙන්ම එක් එක් රටවලට වෙන් කර දෙන බව ද ඇමතිවරයා පැවසීය.

මෙරට ව්‍යාපාරිකයන් රැසක් ද මෙවැනි බදු සහන හේතුවෙන් තම කර්මාන්ත හා ව්‍යාපාර බංග්ලාදේශය, ඉතියෝපියාව, කෙන්යාව වැනි රටවලට ගෙනියමින් සිටින බව ඇමතිවරයා කීවේය.

මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යවරයා වශයෙන් අග්‍රාමාත්‍ය රනිල් වික්‍රමසිංහ මහතා ඉදිරිපත් කළ යෝජනාවකට අමාත්‍ය මණ්ඩල අනුමැතිය හිමිවූ බව ඇමතිවරයා සඳහන් කළේය. ලංකා ඉතිහාසයේ ලැබී ඇති විශාලතම ඍජු විදේශ ආයෝජනය වරාය නගර ව්‍යාපෘතිය බව ද ඇමති බන්දුල ගුණවර්ධන මහතා පැවසීය.