(යොහාන් භාසුර)

වාරිමාර්ග, ක්‍රීඩා හා යෞවන කටයුතු අමාත්‍ය රොෂාන් රණසිංහ මහතා ඉරාන රාජ්‍යයේ සංචාරයක් අතරතුර එරට වාරිමාර්ග, ජලාශ හා බලශක්ති අමාත්‍ය අලි අක්බාර් මහතා සමඟ ක්ෂේත්‍ර රැසක් පිළිබඳව සාකච්ඡා කළේය. 

දෙරට අතර වාරිමාර්ග, ජලාශ, බලශක්ති අංශයේ සහයෝගීතාව තව දුරටත් ශක්තිමත් කිරීම පිළිබදව මෙන්ම විශේෂයෙන් දෙරට අතර වාරිමාර්ග, ජලාශ, බලශක්ති ක්ෂේත්‍රයේ ද්විපාර්ශ්වික සබඳතා පුළුල් කිරීම සදහා ඉරානය ආර්ථික සහයෝගීතාව සදහා වූ ඒකාබද්ධ කොමිසමහි වැදගත්කම මෙහිදී පැහැදිළි කළේය.

මෙගාවෝට් 120 ක් විදුලි උත්පාදනයක් කරන උමා ඔය බහුකාර්ය සංවර්ධන ව්‍යාපෘතිය නිම කිරීම පිළිබදව ඉරානයේ ෆැරබ් සමාගමේ නියෝජිතයින් හට රොෂාන් රණසිංහ අමාත්‍යවරයා ස්තූතිය පුද කළේය.

උතුරු මැද පළාතේ ජනතාව අතර බහුලව ව්‍යාප්ත වී ඇති වකුගඩු ආශ්‍රිත සෞඛ්‍ය ගැටලුව පිළිබදව කරුණු ඉදිරිපත් කළ රොෂාන් රණසිංහ මහතා පොළොන්නරුව, අනුරාධපුරය  දිස්ත්‍රික්කයන්හි කුඩා පරිමාණයේ පිරිසිදු පානීය ජල ව්‍යාපෘති ඉදිකිරීමට සහයෝගය දක්වන ලෙස කළ ඉල්ලීම සදහා ද එරට නියෝජිතයින්ගෙන් යහපත් ප්‍රතිචාර ලැබුණි.

වෙළද, සංචාරක,වාරිමාර්ග,ජලාශ, බලශක්ති ක්ෂේත්‍රවල පවත්නා සබඳතා වැඩි දියුණු කර ගැනීමට ඇති හැකියාව පිළිබදව එරට ප්‍රමුඛ පෙලේ ව්‍යාපාරිකයින් සමග කළ සාකච්ඡා  ශ්‍රී ලංකාවට සුභදායී ලෙස ඉතා සාර්ථක අයුරින් නිමාවට පත් විය.