(සුජිත් හේවාජුලිගේ සහ අංජුල මහික වීරරත්න )

තොරතුරු සන්නිවේදන හා තාක්ෂණ ආයතනය පසුගිය වසර 20ක කාලයේදී ව්‍යාපෘති අතරමග නතර කිරීම හේතුවෙන් රුපියල් කෝටි 3000 ක පමණ පාඩුවක් සිදුවී ඇතැයි තාක්ෂණ අමාත්‍යාංශයේ ලේකම් මහාචාර්ය නෙරන්ජන් ගුණවර්ධන මහතා පොදු ව්‍යාපාර පිළිබඳ පාර්ලිමේන්තු කාරක සභාව (කෝප් කමිටුව) හමුවේ පැවසීය .

සමහර මුදල් ඇතමුන්ගෙ සාක්කු වලට ගොස් ඇතැයි නැගෙන චෝදනා ප්‍රතික්ෂේප නොකරන බවද ඔහු සඳහන් කළේය.

ලේකම්වරයා මෙසේ පැවසුවේ තොරතුරු සන්නිවේදන හා තාක්ෂණ ආයතනයේ කාර්ය සාධනය විමසීම සඳහා එහි ප්‍රධානීන් පොදු ව්‍යාපාර පිළිබඳ පාර්ලිමේන්තු කාරක සභාව හමුවට කැඳවනු ලැබූ අවස්ථාවේදීය .

මෙම ආයතනය නිසි පරිදි තොරතුරු ඉදිරිපත් නොකිරීමෙන් පාර්ලිමේන්තුව සහ විගණකාධිපතිවරයා මග හැර ඇතැයිද එහිදී තොරතුරු අනාවරණය විය.

ආයතනයේ 130ක පමණ නිලධාරින්ගෙන් දැනට සිටින්නේ අසූ හතක් පමණක් බවද ආයතනයේ නිලධාරීහු පෙන්වා දුන්හ.

එම ආයතනයේ සිදුවී ඇතැයි පැවසෙන දූෂණ වංචා තවත් රැසක් සම්බන්ධයෙන්ද එහිදී තොරතුරු අනාවරණය විය.