(විමුක්ති එස් රුද්‍රිගු)

‘හිරෝයික් ඉදුන්‘ බොරතෙල් ප්‍රවාහන නෞකාවේ  ශ්‍රී ලාංකිකයන් 8 දෙනා ඇතුළු කාර්ය මණ්ඩලය නයිජීරියානු ආරක්ෂක අංශ භාරයට ගෙන ඇත.

‘හිරෝයික් ඉදුන්‘ බොරතෙල් ප්‍රවාහන නෞකාව නයිජීරියාවට පැමිණි පසු විමර්ශනයක් පවත්වා වැරදිකරුවන් වුවහොත් එහි සේවය කරන ශ්‍රී ලාංකිකයන් 8 දෙනා ඇතුළු සමස්ත කාර්ය මණ්ඩලයට බොරතෙල් සොරකම් කිරීම සම්බන්ධයෙන්  චෝදනා ගොනු ගොනු කරන  බව නයිජීරියානු නාවික හමුදාව පැවසුවේය.

‘හිරෝයික් ඉදුන්‘ නෞකාවේ කාර්ය මණ්ඩලය 26 ක් වන අතර එයට ශ්‍රී ලාංකිකයන් 8 ක් සහ ඉන්දියානු ජාතිකයන් 16 ක් අයත් ය. ශ්‍රී ලාංකික, ඉන්දියානු ජාතිකයන්ට අමතරව එක් පෝලන්ත ජාතිකයෙකු සහ පිලිපීන ජාතිකයෙකුද  කාර්ය මණ්ඩලයට අයත් වේ.

නයිජීරියාවේදී බොරතෙල් සොරකම් කිරීමේ චෝදනාව මත ඉකුත් අගෝස්තු මස ඉක්වටෝරියල් ගිනි රාජ්‍යයේදී අත් අඩංගුවට ගත් ‘හිරෝයික් ඉදුන්‘ බොරතෙල් ප්‍රවාහන නෞකාව තම භාරයට ගැනීම සඳහා  ඉක්වටෝරියල් ගිනි නාවික හමුදාව සමග සාකච්ඡා කළ බවත් ‘හිරෝයික් ඉදුන්‘ නෞකාව  නයිජීරියා බලා යාත්‍රා කිරීම මේ වන විට ආරම්භ කර ඇති බවත් නයිජීරියානු නාවික හමුදාව ප්‍රකාශ කර තිබේ.

පසුගිය අගෝස්තු 12 වැනිදා ඇක්පෝ බොරතෙල් පැටවීමේ අංගනයෙන් පිටත් වීමට අවසර නොමැතිව මුහුදු කොල්ලකරුවන් ලුහුබඳිනවා යැයි පවසමින් නයිජීරියානු නාවික හමුදාවෙන් පළා යමින් සිටියදී  ඉක්වටෝරියල් ගිනි නාවික හමුදාව මෙම නෞකාව අත්අඩංගුවට ගත් බව නයිජීරියානු බලධාරීහු ප්‍රකාශ කළහ.

නයිජීරියානු ජාතික ඛනිජ තෙල් සමාගම කළ විමසීමකදී මෙම නෞකාවට ඇක්පෝ බොරතෙල් පැටවීමේ අංගනයට පැමිණ බොරතෙල් පැටව ගැනීමට  අවසර ලබා දී නොතිබූ බවත් අවසරයක් නොමැතිව මෙම නෞකාව බොරතෙල් පටවා ගැනීමට උත්සහ දරා ඇති බවත් දැනුම් දුන් බව නයිජිරියානු ආරක්ෂක අංශ සඳහන් කළේය.‘හිරෝයික් ඉදුන්‘ නෞකාවේ කපිතාන් වරයා නයිජීරියානු ආරක්ෂක අංශවලට සහාය දැක්වීමද ප්‍රතික්ෂේප කළ බවද පැවැසේ.

නෞකාව අත් අඩංගුවට පත් වී තිබීම හේතුවෙන් මාස හතරක කාලයක සිට එහි සිරවී සිටින තමන් බේරාගන්නා ලෙස ශ්‍රී ලාංකිකයන් 8 දෙනා මෙරට බලධාරීන්ගෙන් ඉල්ලීමක් කර ඇති බවද පැවැසේ.