(අංජුල මහික වීරරත්න සහ සුජිත් හේවාජුලිගෙ)

සිංහල මාධ්‍යයෙන් සමාජ මාධ්‍යයේ තොරතුරු ලබා ගන්නන්ගෙන් තුනෙන් දෙකක්ම ව්‍යාජ තොරතුරු වලට රැවටී සිටින බවට සමීක්ෂණයකින් තහවුරු වී ඇතැයි ගාල්ල  දිස්ත්‍රික් මන්ත්‍රී ගයන්ත කරුණාතිලක මහතා:-(ස.ජ.බ) පාර්ලිමේන්තුවේදී පැවසීය.

අප රටේ ජනමාධ්‍ය වලට බලපාන නීති බොහොමයක් රටේ මාධ්‍ය නිදහස තහවුරු කිරීමට වඩා සීමා කිරීමට යොදා ගන්නවා.ඒ කාරණය මෑතකදී ජාත්‍යන්තර නීති සඟරාව විසින් තහවුරු කර තිබුණා.එදා 2024 වසරේදී අප රටේ මාර්ගගත ආරක්ෂණ පනත සම්මත කළා.ඒ පනතින් මෙරට අන්තර්ජාල සහ සමාජ මාධ්‍ය නිදහසට බරපතළ ලෙස සීමා පැනවූ බවට චෝදනා එල්ල වුණා.

පසුගිය වසරේත් මේ පනත යොදාගෙන අදහස් ප්‍රකාශ කිරීමේ නිදහසට සීමා පැනවූ අවස්ථා ගණනාවක් වාර්තා වුණා.මේ පනත අහෝසි කරන බවට ඔබේ ආණ්ඩුව පොරොන්දු වුණත් දැන් ඒ ගැන වචනයක්වත් කතා කරන්නේ නැහැ.ලයින් ඒෂියා සංවිධානය මගින් පසුගිය වසරේ කළ සමීක්ෂණයකින් තහවුරු වන්නේ සිංහල මාධ්‍යයෙන් සමාජ මාධ්‍යයේ තොරතුරු ලබා ගන්නන්ගෙන් තුනෙන් දෙකක්ම ව්‍යාජ තොරතුරු වලට රැවටී සිටින බවයි.

මේ තත්ත්වය රටේ ජනතාවට නිවැරදි තීරණ ගැනීමට අහිතකර ලෙස බලපා තිබෙනවා.එය රටේ ප්‍රජාතන්ත්‍රවාදයට බරපතළ තර්ජනයක්.ඒ නිසා රටේ තරුණ පරපුර මෙන්ම ළමයින් මාධ්‍ය සාක්ෂරතාවයෙන් බලාත්මක කිරීමේ වැඩසටහනක් වහා ඇරැඹිය යුතු බවට මා යෝජනා කරනවා යනුවෙන්ද කරුණාතිලක මහතා කීය.