(රෝෂන් තුෂාර)

මහවිරු සමරුව සම්බන්ධයෙන් අසත්‍ය වැකි සහිත වීඩියෝ දර්ශන සහ  එල්ටීටීඊ සංවිධානයේ නායක වේලුපිල්ලේ ප්‍රභාකරන්ගේ ඡායාරූප ද සහිතව සමාජ මාධ්‍යයේ පළකළේ යැයි අත් අඩංගුවට ගෙන අධිකරණයට ඉදිරිපත් කළ  ශ්‍රී ලංකා පොදුජන පෙරමුණේ පාලක ලේකම් රේණුක පෙරේරා රුපියල් ලක්ෂ දහයක  ශරීර ඇපයක් මත මුදා හැරීමට කොළඹ අතිරේක මහේස්ත්‍රාත් මංජුල රත්නායක මහතා අද(05)නියෝග කළේය.

මහා විරු සමරුව සම්බන්ධයෙන් අසත්‍ය කරුණු සිය ෆේස්බුක් සමාජ මාධ්‍ය ඔස්සේ පැතිරීමට එරෙහිව අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන ඒකකය මගින්  සැකකරු අත්අඩංගුවට ගෙන අධිකරණයට ඉදිරිපත් කළේය.

මහජන සාමය කඩවන හා ජාතීන් අතර සංහිඳියාවට බාධා එල්ල විය හැකි තොරතුරු සමාජ ජාලයේ පැතිරවීම යන මෙම ක්‍රියාදාමය තුළින් සැකකරු දණ්ඩ නිතී සංග්‍රහයේ 120 වගන්තිය යටතේ වරදක් සිදු කර ඇති හෙයින් සැකකරු රක්ෂිත බන්ධනාගාර ගත කරන ලෙස රහස් පොලිසිය අධිකරණයෙන් ඉල්ලා සිටි අතර සැකකරු වෙනුවෙන් පෙනී සිටි නීතිඥවරු කළ කරුණු දැක්වීම් වලින් පසුව සැකකරුට ඇප නියම කිරීමට මහේස්ත්‍රාත්වරයා නියෝග කළේය.