(සුමිත් පොතුපිටිය සහ බිමල් ශ්‍යාමන් ජයසිංහ)

ඉන්දීයාවේදී  ව්‍යාපාරිකයකු සමග ලිංගිකව හැසිරෙන අතරතුර එය හොර රහසේ වීඩියෝ ගතකර පසුව එම ව්‍යාපාරිකයා බිය වද්දා රුපියල් ලක්ෂ 70 ක කප්පම් මුදලක් ලබාගැනීම සම්බන්ධයෙන් රූමත් කාන්තාවක සහ එයට අනුබල දුන් 45 හැවිරිදි පුද්ගලයකු අත්අඩංගුවට ගත්බව කළුතර කොට්ඨාස අපරාධ විමර්ශන ඒකකය පවසයි .

මෙසේ අත්අඩංගුවට ගෙන ඇත්තේ මාළිගාවත්ත, ජුම්මා මස්තිස් පාරේ පදිංචි 33 හැවිරිදි කාන්තාවක සහ 45 හැවිරිදි පුද්ගලයකු බව පොලිසිය කීය.

බේරුවල , එගොඩවත්ත ප්‍රදේශයේ ව්‍යාපාරිකයකු විසින් කරන ලද පැමිණිල්ලක් අනුව සැකකරුවන් අත්අඩංගුවට ගත්බව පොලිසිය පවසයි .

සැකකාර කාන්තාව ඉන්දියාවේ දී පැමිණිලිකාර ව්‍යාපාරිකයා හදුනාගෙන ඇති අතර , එහිදී ඇතිවූ සම්බන්ධ කමක් මත අවස්ථා කිහිපයකදී ලිංගිකව හැසීරී එය සිය ජංගම දුරකථනයෙන් හොර රහසේ වීඩියෝ ගතකර ඇතැයි පොලිසිය කීය.

සැකකාරිය එම දර්ශන සීඩී තැටිවලට පටිගත කොට ව්‍යාපාරිකයාගේ පවුලේ සාමාජිකයන්ට පෙන්වන බවට බියවද්දා රුපියල් ලක්ෂ 70 ක කප්පම් මුදලක් ඉල්ලා ඉන් රුපියල් ලක්ෂ 10 ක මුදලක් ලබාගෙන ඇතැයිද පොලිසිය කීය.

ඉතිරි මුදල ලබාගැනීම සදහා, සැකකාරිය එයට අනුබල දුන් පුද්ගලයා සමගින් මෝටර් රථයකින් පැමිණ සිටියදී අත්අඩංගුවට ගෙන තිබේ.

තවදුරටත් ඔවුන් පරීක්ෂා කිරීමේදී දෙදෙනා ලිංගිකව හැසිරෙන දර්ශන ඇතුලත් සීඩී තැටි 2 ක් සහ ස්මාර්ට් ජංගම දුරකථනයක් සොයාගෙන ඔවුන් පැමිණි මොටර් රථයද භාරයට ගත්බව පොලිසිය පවසයි .

සැකකරුවන් කළුතර මහේස්ත්‍රාත් අධිකරණයට ඉදිරිපත් කිරීමට නියමිතව තිබුණි .