(සුජිත් හේවාජුලිගේ)

රටේ කොවිඩ්  පැතිරීම සියයට 10 කින් පමණ වැඩිවී ඇති හෙයින් ජනතාව සෞඛ්‍ය මාර්ගෝපදේශ නිසියාකාරව පිළිපදිමින් ප්‍රවේශම් විය යුතු  බව  කොවිඩ්  සම්බන්ධීකාරක සහ සෞඛ්‍ය අමාත්‍යාංශයේ තාක්ෂණ සේවා අධ්‍යක්ෂ වෛද්‍ය අන්වර් හම්දානි මහතා ලංකාදීපයට පැවැසීය.

කොවිඩ්  මරණ  4ත් 5ත් අතර සංඛ්‍යාවක් දෛනිකව වාර්තාවන බවද හෙතෙම සඳහන් කළේය.

කුමන පැතිරීමක් ඇතිවුවත් රට හෝ වෙනයම්   ස්ථානයක් හෝ කිසිසේත්ම නොවසන බව  පැවසූ කොවිඩ්  සම්බන්ධීකාරකවරයා  කොවිඩ්  සඳහා රටේ ප්‍රශස්ත ප්‍රතිශක්තියක් පවතින හෙයින් කොවිඩ්  රෝගීන් නිවෙස්වලම බොහෝ දුරට කළමනාකරණය කර ගැනීමේ හැකියාවක් පවතින බවද ප්‍රකාශ කළේය.

කොවිඩ්  පැතිරීම වළක්වා ගැනීම සඳහා කොවිඩ්  සෞඛ්‍ය මාර්ගෝපදේශ  නිසියාකාරව පිළිපදින්නැයි  ජනතාවගෙන් ඉල්ලීමක් කරන බවද අන්වර් හම්දානි මහතා  පැවසුවේය.

නියමිත එන්නත් මාත්‍රා ලබා ගෙන නැති පුද්ගලයන්  වහාම එන්නත් ලබා ගැනීමට කටයුතු කළ යුතු බවත්   ඒ සඳහා අවශ්‍ය සියලු පහසුකම් සලසා ඇති බවත් වෛද්‍යවරයා සඳහන් කළේය.

රටේ පවතින කොවිඩ්  පැතිරීම අඩුවෙන් තක්සේරු නොකළ යුතු බව හෙතෙම වැඩිදුරටත් පැවසීය.