(ඩයනා උදයංගනී)

රජයේ නිලධාරීන්ට විදේශ රැකියාවක හෝ වෙනත් ඵලදායී කාර්යයක නිරතවීම සඳහා ජ්‍යෙෂ්ඨත්වයට හා විශ්‍රාම වැටුපට අගතියක් නොවන පරිදි වසර 5ක කාලයකට වැටුප් රහිත නිවාඩු ලබාදීමට අමාත්‍ය මණ්ඩල අනුමැතිය හිමිවී ඇත.

ඒ සඳහා දැනට පවතින විධිවිධාන සංශෝධනය කරමින් අදාළ චක්‍රලේඛ උපදෙස් නිකුත් කිරීම වෙනුවෙන් රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන අමාත්‍ය දිනේෂ් ගුණවර්ධන මහතා ඉදිරිපත් කළ යෝජනාවකට මෙලෙස අමාත්‍ය මණ්ඩල අනුමැතිය හිමිව තිබේ.

රජයේ නිලධාරියෙකුට අධ්‍යයන හෝ විදේශ රැකියා සඳහා සිය සේවා කාලය තුළ උපරිම වශයෙන් වර්ග 5 ක කාල සීමාවකට වැටුප් රහිත නිවාඩු ලබා ගැනීමේ හැකියාව දැනට පවතින විධිවිධාන අනුව ඇතත්, විශ්‍රාම වැටුප් ගණනය සඳහා එම කාල සීමාව සැලකිල්ලට නොගැනීම, ජ්‍යෙෂ්ඨතාවයට බලපෑමක් සිදු වීම හා වෙනත් කොන්දේසි හේතුවෙන් රජයේ සේවකයින් එලෙස නිවාඩු ලබාගැනීම කෙරෙහි එතරම් උනන්දුවක් නොදක්වන බව දිනේෂ් ගුණවර්ධන මහතා ඉදිරිපත් කළ යෝජනාවේ දැක්වේ.

රටේ දැනට පවතින ආර්ථික තත්ත්වය සැලකිල්ලට ගෙන, රාජ්‍ය නිලධාරින්ට විදේශ රැකියාවක හෝ වෙනත් ඵලදායී කාර්යයක නිරතවීමේ අවස්ථාව ලබාදීම වෙනුවෙන් මෙම තීරණය ගෙන ඇත.