(අංජුල මහික වීරරත්න)

ස්ථාවර තැන්පතු වල ගිවිසුම් ගත සම්පූර්ණ කාලසීමාව සඳහා අදාළ පොලිය ගෙවීමට බැංකු කැපවී සිටින බව ලංකා බැංකුවේ ප්‍රධාන විධායක නිලධාරී සහ ශ්‍රී ලංකා බැංකු සංගමයේ සාමාජික රසල් ෆොන්සේකා මහතා පැවසීය.

දේශීය ණය ප්‍රශස්තකරණය තැන්පත්කරුවන්ට කිසිදු පාඩුවක් හෝ බලපෑමක් ඇති නොකරන බවත් බැංකු විසින් පිරිනමනු ලබන පොලී අනුපාතවලට බලපෑමක් නොවන බවත් රසල් ෆොන්සේකා මහතා කීය.

රසල් ෆොන්සේකා මහතා මේ බව පැවසූයේ ජනාධිපති මාධ්‍ය අංශයේ "101 කතා" වැඩසටහනට එක් වෙමිනි.

ජනපතිගේ වැඩපිළිවෙළ සඳහා බැංකු සංගමය සහ දේශීය බැංකු සංගමය සහයෝගය ලබාදීමට  එකඟතාවය පළ කර තිබෙන බවද ඒ අනුව බැංකු පොලිය අඩු කිරීමට සැලසුම් කර තිබෙන අතර එම පොළී අනුපාත අඩු කිරීම ඉදිරි මාස දෙක ඇතුළත සිදුකෙරෙනු ඇතැයි ෆොන්සේකා මහතා සඳහන් කළේය.

එම අඩු පොලිය යටතේ සුළු හා මධ්‍ය පරිමාණ ව්‍යාපාරිකයන්ට, අපනයන කර්මාන්තයේ නියැලී සිටින්නන්ට මෙන්ම ප්‍රධාන පෙළේ ව්‍යාපාරිකයන්ට තම ව්‍යාපාර දියුණු කර ගැනීමට හැකියාව ලැබෙන බව රසල් ෆොන්සේකා මහතා කීය.

වැඩකරන ජනතාවගේ අහිමි වීමට තිබූ අරමුදල් දේශීය ණය ප්‍රශස්තකරණය නිසා සුරක්ෂිත වන බව ද රසල් ෆොන්සේකා මහතා වැඩිදුරටත් සඳහන් කළේය.