(සුජිත් හේවාජුලිගේ )

පළාත් පාලන ආයතනවල කම්කරුවන් 10,355 දෙනකුගේ සේවය ස්ථිර කිරීමට තීරණය කර ඇතැයි පළාත් සභා සහ පළාත් පාලන රාජ්‍ය අමාත්‍ය ජානක වක්කුඹුර මහතා පැවසීය.

මෙම පිරිසට අනියම් කොන්ත්‍රාත් සහ  ආදේශක කම්කරුවන් ඇතුළත් වන බවත්  පිරිස  ස්ථිර කිරීමට ජනාධිපතිවරයා සහ අගමැතිවරයා එකගවී ඇති බවත් රාජ්‍ය අමාත්‍යවරයා කීවේය.

තමන්ගේ සේවය ස්ථිර කරන්නැයි  එම අනියම් කම්කරුවෝ දීර්ඝ කාලයක් තිස්සේ රජයෙන් ඉල්ලීම් කළහ.

පළාත් පාලන ආයතන විසුරුවා හැර ඇති තත්වය යටතේ මෙම අනියම් කම්කරුවන්ගෙන් සිදුවන සේවය සැලකිල්ලට ගෙන ඔවුන් මෙලෙස  ස්ථිර කිරීමට පියවර ගන්නා බව ජානක වක්කුඹුර මහතා  වැඩිදුරටත් පැවසීය.

රට පුරා පළාත් පාලන ආයතන 330 ක්‍රියාත්මක වේ. මහනගර  සභා 18 ක්,නගරසභාව 42ක් සහ ප්‍රාදේශීය සභා 270 ක්  ඊට ඇතුළත්ය.