(සුජිත් හේවාජුලිගේ සහ  අංජුල මහික වීරරත්න)

ඉන්ධන අර්බුදය සහ පාර්ලිමේන්තුවේ  ආරක්ෂාව සම්බන්ධයෙන්ද පාර්ලිමේන්තු කටයුතු පිළිබඳ කාරක සභාවේදී අද (3) සාකච්ඡා කෙරුණු බව  සභානායක දිනේෂ් ගුණවර්ධන මහතා පැවසීය.

මේ අතර පාර්ලිමේන්තුව ලබන 8 වැනිදා සිට 11 වැනිදා දක්වා රැස්වීමටද එහිදී තීරණය කෙරුණු බව ඔහු සඳහන් කළේය.

පාර්ලිමේන්තු කටයුතු පිළිබඳ කාරක සභාව  කතානායක මහින්ද යාපා අබේවර්ධන මහතාගේ ප්‍රධානත්වයෙන් පාර්ලිමේන්තු සංකීර්ණයේදී අද (3) පස්වරුවේ පැවැත්විණ.

අනුමත ලේඛණයේ නොමැති භාණ්ඩ පාර්ලිමේන්තුවට  ගෙන ඒම  සම්බන්ධයෙන්ද මෙහිදී සාකච්ඡාවී ඇත.

බුද්ධිමය දේපළ සංශෝධන පනත් කෙටුම්පත පාර්ලිමේන්තුවේ අනුමැතිය සඳහා ලබන 8 වෙනිදා ඉදිරිපත් කිරීමටය.

පෞද්ගලික දත්ත ආරක්ෂණ පනත් කෙටුම්පත සම්මත කිරීම සඳහා පාර්ලිමේන්තුවට ලබන 9වැනි දා ඉදිරිපත් කෙරෙනු ඇත. 

එමෙන්ම එදින විපක්ෂය විසින් ගෙන එනු ලබන   කල් තැබීමේ යෝජනාවක්ද විවාදයට ගැනීමට නියමිතය.

සේවක වන්දි ආඥාපනත (සංශෝධන) පනත් කෙටුම්පත ලබන දහවෙනිදා  සම්මත කර ගැනීමට නියමිතව ඇත. එදින සවස්වරුවේ විපක්ෂය විසින් ගෙන එනු ලබන කල් තැබීමේ යෝජනාවක්ද විවාදයට ගැනෙනු ඇත.

පෞද්ගලික මන්ත්‍රී යෝජනා 03ක් පාර්ලිමේන්තුවට ලබන එකොළොස් වැනිදා සිකුරාදා  ඉදිරිපත් කිරීමට නියමිතය.

මෙයට අමතරව  ඉඩම් සංවර්ධන ආඥාපනත සංශෝධන කිරීම සඳහා වූ පනත් කෙටුම්පතද මෙදින සම්මත කර ගන්නා බව සභානායකවරයා කීවේය.