(සුජිත් හේවාජුලිගේ සහ  අංජුල මහික වීරරත්න)

දේශීය ණය ප්‍රතිව්‍යුහගතකරණයට අදාළ යෝජනාව විවාදයට ගැනීම සඳහා  ලබන මස 1 වැනිදා සෙනසුරාදා  හදිසි පාර්ලිමේන්තු  රැස්වීමක් පැවැත්වෙනු ඇතැයි එහි ආරංචිමාර්ගවලින් පැවසේ.

මේ සම්බන්ධයෙන් අවසාන තීරණය ගැනීම සඳහා පාර්ලිමේන්තු කටයුතු පිළිබඳ කාරක සභාවේ විශේෂ රැස්වීමක් හෙට (27) පෙරවරු 11.00  ට පැවැත්වීමට නියමිතය.

මෙම විවාදයෙන් අනතුරුව එදින පස්වරුවේ ඒ පිළිබඳව ඡන්ද විමසීමක් ද පැවැත්වෙනු ඇත.

මෙම හදිසි පාර්ලිමේන්තු රැස්වීම හේතුවෙන් මේ සතියේ කොළඹ රැඳී සිටින ලෙස ආණ්ඩු පක්ෂ සංවිධායක කාර්යාලය සියලු මැති ඇමැතිවරුන්ට දැනටමත් දැනුම්දී ඇත.

එසේම  විදේශ සංචාරවල  නොයෙදෙන ලෙසටද ඔවුනට දන්වා  ඇතැයි වාර්තා වේ.

මේ අතර මේ සම්බන්ධයෙන් සාකච්ඡා කිරීම සඳහා ආණ්ඩු පක්ෂ මන්ත්‍රී කණ්ඩායමේ රැස්වීමක් ජනාධිපති රනිල් වික්‍රමසිංහ මහතාගේ  ප්‍රධානත්වයෙන්  හෙට ( 28) පැවැත්වීමට නියමිතය.

එසේම දේශීය ණය ප්‍රතිව්‍යුහගතකරණය සම්බන්ධයෙන් සාකච්ඡා කිරීම සඳහා සමගි ජන බලවේගයේ  පාර්ලිමේන්තු මන්ත්‍රී කණ්ඩායම අද (26) පස්වරුවේ රැස් වීමට තීරණය කර ඇත.