(රෝෂන් තුෂාර)

දෙවුන්දර මුහුදු තීරයේදී නාවික හමුදාව මගින්  අත්අඩංගුවට ගත් රුපියල් කෝටි 380 කට අධික වටිනාකමින් යුත් මත්ද්‍රව්‍ය  තොගය රජයේ රස පරීක්ෂකවරයා වෙත යොමු කිරීමට කොළඹ අතිරේක මහේස්ත්‍රාත් බණ්ඩාර ඉළංඟසිංහ මහතා අද (19) නියෝග කළේය.

පසුගිය දොළොස්වෙනි දින ධීවරින් දස දෙනෙකු සමග  අත් අඩංගුවට ගත් කිලෝ ග්‍රෑම් 263 ක මත්ද්‍රව්‍ය තොගය පොලිස් මත්ද්‍රව්‍ය කාර්යාංශය මගින් අධිකරණයට ඉදිරිපත් කිරීමෙන් අනතුරුව මහේස්ත්‍රාත්වරයා මෙම නියෝගය නිකුත් කළේය.

දෙවුන්දර ධීවරයින් 10 දෙනෙකු ගමන් ගත් බහුදින ධීවර යාත්‍රාවක තිබියදී අත්අඩංගුවට ගත් අයිස් මත්ද්‍රව්‍ය කිලෝ ග්‍රෑම් 179.906ක් සහ හෙරොයින් කිලෝග්‍රෑම් 83.582ක් මත්ද්‍රව්‍ය කාර්යාංශය පොලිපැක් උර පහළොවක බහා අධිකරණයට ඉදිරිපත් කළ අතර මහේත්‍රාත්වරයාගේ නියෝගයෙන් අනතුරුව  අධිකරණ රෙජිස්ඨාර් වරයාගේ නිරීක්ෂණය යටතේ ලාකඩ මුද්‍රා තබා රජයේ රස පරීක්ෂකවරයා වෙත යොමු කෙරිණි.

දෙවුන්දර විරලයේ සිට කිලෝමීටර් 246 ක්  ඈත මුහුදේදී නාවික හමුදාව විසින් මෙම මත්ද්‍රව්‍ය තොගය අත්අඩංගුවට ගෙන තිබිණි .

මත්ද්‍රව්‍ය සන්තකයේ තබා ගැනීම හා ජාවාරම් කිරීමට එරෙහිව ධීවරයින්ට පනවා ඇති නඩුව ලබන විසි දෙක දින අධිකරණයේ කැඳවීමට නියමිතය.