(යොහාන් භාසුර)

දුම්රිය රියදුරු සංගමය ක්‍රියාත්මක කළ පැය 20 ක වැඩ වර්ජනය හේතුවෙන් ඊයේ (23) පස්වරුවේ සිට දුම්රිය ගමන් වාර 80 ක් අවලංගු කළ බව දුම්රිය දෙපා්තමේන්තුව පවසයි.

වර්ජනය හේතුවෙන් අද (24) දිනයේ පමණක් දුම්රිය ගමන් වාර 65 ක් අවලංගු කළ බවත් ප්‍රධාන මාර්ගයේ පමණක් ගමන් වාර 36 ක් අවලංගු වූ බවත් දුම්රිය දෙපාර්මේන්තුවේ උසස් නිලධාරියෙක් පැවසීය.

මුහුදුබඩ මාර්ගයේ ගමන් වාර 16 ක්, පුත්තලම් මාර්ගයේ ගමන් වාර 8 ක්, කැළණිවැලි මාර්ගයේ ගමන් වාර 4 ක් සහ උතුරු මාර්ගයේ ගමන් වාරයක් අද දිනයේ අවලංගු කළ බවත් ඊයේ දිනයේ ද ගමන් වාර 15 ක් අවලංගු කළ බවත් එම නිලධාරියා කීය. 

වැඩ වර්ජනය අද පස්වරු 3.00 ට පමණ අත්හිටුව ද තවත් ගමන් වාර 18 ක් අත්හිටුවූ බව ද එම නිලධාරියා සඳහන් කළේය.