(අංජුල මහික වීරරත්න)

වී අලෙවි මණ්ඩලය මේ වනවිට වී මිල දී ගන්නේ  සියයට අටක පොලිය යටතේ රාජ්‍ය බැංකුවකින් සහ ගොවි බාරකාර මණ්ඩලයෙන්  ගත් ණය මුදලකින්  බව කෘෂිකර්ම අමාත්‍ය මහින්ද අමරවීර මහතා පැවසීය.

වී අලෙවි මණ්ඩලය විසින් දැනට වී මිල දී ගැනීම ආරම්භ කර තිබේ. වී මිල දී ගැනීම සඳහා වී අලෙවි මණ්ඩලයට ණය මුදලක් ලබා ගැනීමට අමාත්‍ය මණ්ඩලයේ අනුමැතිය හිමිවී තිබේ.

ඒ අනුව රාජ්‍ය බැංකුවකින් සියයට අටක පොලියක් යටතේ ලබා ගත් ණය මුදලක් මත මේ වනවිට වී මිල දී ගැනීම ආරම්භ කර ඇතැයි කෘෂිකර්ම අමාත්‍ය මහින්ද අමරවීර මහතා පවසයි.

මේ හැර ගොවි බාරකාර අරමුදලෙන් ද ණය මුදලක් ලබා ගෙන ඇති අතර දැනට වී මිල දී ගැනීම සඳහා යොදවනු ලබන්නේ එම මුදල් බව කෘෂිකර්ම අමාත්‍යවරයා කීය.

වී අලෙවි මණ්ඩලය කිසිදු අවස්ථාවක ගොවීන් සතු  වී වලින් සියයට සියයක් මිල දී ගෙන නැතැයි ද  සාමාන්‍යයෙන් සමස්ත වී අස්වැන්නෙන් සියයට 10ක් පමණ උපරිම ප්‍රමාණයක් දක්වා වී මිල දී ගෙන ඇති අතර ඇතැම් වර්ෂවල සියයට එකක්වත් මිල දී නොගත් අවස්ථා ද තිබෙන බව අමාත්‍යවරයා සඳහන් කළේය.

කෙසේ වුවද මෙවර වී අලෙවි මණ්ඩලය වී මිල දී ගන්නේ ලැබෙන මුදල් ප්‍රමාණය මත බව ද කෘෂිකර්ම අමාත්‍යවරයා අවධාරණය කළේය.

දැනට  පෞද්ගලික  අංශය විසින් වී කිලෝවක් රුපියල් 65-70 වැනි මිලකට මිල දී ගන්නා බව ගොවීහු සඳහන් කරති. එසේ වුවත් වී අලෙවි මණ්ඩලය විසින් වී මිල දී ගනු ලබන්නේ මුදල් අමාත්‍යාංශයේ මිල කමිටුවේ තීරණය පරිදි නාඩු වී කිලෝවක් රුපියල් 95කටත්, සම්බා වී කිලෝවක් රුපියල් 100කටත් හා කීරි සම්බා වී කිලොවක් රුපියල් 110ක් වැනි මුදලකට බව අමාත්‍යාංශය පවසයි.

වී අලෙවි මණ්ඩලය විසින් සියයට අටක පොලියක් යටතේ ලබා ගන්නා ලද ණය මුදල අදාල බැංකුවට ආපසු ගෙවීමට නම් එම මණ්ඩලය විසින් මෙම වී සහල් බවට පත් කර ලාභයක් ද ලැබිය යුතුව තිබෙන බව අමාත්‍යාංශය කියයි.