(කුෂාන් ජයවර්ධන)

දර තොගයක් ප්‍රවාහනය කරමින් තිබූ අත්ට්‍රැක්ටරයක් පලාගල නාන්වත්තේගම ප්‍රදේශයේදී පෙරළීයාමෙන් එහි ගමන්ගත් 14 හැවිරිදි පාසල් සිසුවකු මියගොස් තිබේ.

එම අනතුරින් මිය ගොස් ඇත්තේ නෑගම නාන්වත්තේගම ප්‍රදේශයේ පදිංචිව සිටි වීරසිංහ ආරච්චිගේ සෙනෙත් ඒෂාන් වීරසිංහ නමැති 14 හැවිරිදි පාසල් සිසුවෙකි.

ඔහු නෑගම සිරිසුමන විදුහලේ නව වැනි වසෙරේ ඉගෙනුම ලබමින් සිටි සිසුවකු බව පොලිසිය කියයි.

පලාගල අලියාමලගල මාර්ගයේ කිවුල්පිටිය හන්දිය ප්‍රදේශයේදී අනතුර සිදුව තිබිණි. දර ප්‍රවාහනය කරමින් තිබූ අත්ටැක්ටරයක් බෑවුමක් හා වංගුවක් සහිත ස්ථානයකදී රියදුරුගේ පාලනයෙන් ගිලිහි මාර්ගයෙන් ඉවත පැන පෙරළී යාමෙන් මෙම අනතුර සිදුව තිබේ.

අනතුර සිදුවන අවස්ථාවේ රියදුරු හා මිය ගිය සිසුවා හා තවත් අයෙකු එම අත්ට්‍රක්ටරයේ ගමන් කරමින් සිට ඇති බව සිදුකළ පොලිස් විමර්ශණවලදී අනාවරණය කර ගෙන තිබේ.

ට්‍රැක්ටරය පෙරළී යාමත් සමඟ එහි සිටි රියදුරා හා සිසුවා ඇතුළු පිරිස ඉන් ඉවතට විසිවි වැටී ඇති අතර එම අවස්ථාවේ දර පැටවූ ට්‍රැක්ටර් ටේලරය බිම වැටුනු සිසුවා මතට ඇද වැටීමෙන් මෙම අනතුර සිදුව ඇති බව පොලිසිය කියයි.

අනතුරින් බරපතළ තත්වයේ පසුවූ සිසුවා එම අවස්ථාවේදී පොලිසිය හා ප්‍රෙද්ශවාසීන් එක්ව කලාවැව ප්‍රාදේශීය රෝහලට ඇතුළත් කිරීමට පියවර ගෙන තිබූ අතර රෝහල් ගතකරනවිටත් එම සිසුවා මිය ගොස් සිටි බව පොලිසිය කියයි.

අනතුර සම්බන්ධයෙන් සැකපිට පොලිස් අත්අඩංගුවට ගෙන ඇති ට්‍රැක්ටර් රථ රියදුරු අද(04) කැකිරාව මහේස්ත්‍රාත් අධීකරණයට ඉදිරිපත් කිරීමට නියමිත බව පොලිසිය කියයි.