(ශාන්ත ප්‍රදීප් කුමාර කුලරත්න)

ජපානයෙන් මෙරටට ගෘහභාණ්ඩ ආනයනය කොට බෙදා හරින පන්නිපිටිය පොල්වත්ත හන්දිය ආසන්නයේ පිහිටි කර්මාන්ත ශාලාවක අද රාත්‍රී ඇතිවූ ගින්නකින් එම කර්මාන්ත ශාලාව සම්පූර්ණයෙන්ම ගිනිගෙන විනාශ වී ඇතැයි මහරගම පොලිසිය පවසයි.

ගින්න සිදුවන අවස්ථාවේදී එහි ආරක්ෂක නිලධාරියා රැඳී සිට ඇති අතර ගින්නෙන් ඔහුට කිසිදු හානියක් වී නොමැති බව පොලිසිය කියයි.

ගින්න හට ගැනීමත් සමග කෝට්ටේ කොළඹ සහ දෙහිවල මහා නගර සභාවට අයත් ගිනි නිවන රථ හයක් සේවකයන් විසිදෙනකු සමග පැමිණ පැයක් ඇතුළත ගින්න නිවා දැමූ බව කෝට්ටේ ගිනි නිවන අංශයේ කාර්ය භාර නිලධාරී ඩී ඩී සුනන්ද මහතා පවසයි.

ගින්නට හේතුව මෙතෙක් අනාවරණය වී නොමැති අතර ගින්නෙන් කෝටි ගණනක අලාභයක් සිදුව ඇති බව පොලිසිය පවසයි.