(තිලකරත්න දිසානායක)

"අද රටේ ජනතාව බලන්නෙ මඩ ගැසීමේ දේශපාලනයක් නොව, ජනතාව බලාපොරොත්තු වෙන්නෙ ඇත්තෙන්ම හරි තොරතුරක් දැන ගැනීමටයි. මේ නිසා සමාජ මාධ්‍ය කරනවා නම් රජයට මඩ ගැසීම නොව අද වනවිට පවතින සැබෑ තත්ත්වය ජනතාවට පැහැදිලි කරදීමක් සිදු කරමින් රට යන්නේ කුමන පැත්තකටදැයි යන්න දැනුවත් කිරීමක් කළ යුතුයි " යැයි එක්සත් ජාතික පක්ෂ නියෝජ්‍ය නායක රුවන් විජයවර්ධන මහතා ගම්පහදී පැවසීය.

එක්සත් ජාතික පක්ෂයේ සිරිකොත පක්ෂ මූලස්ථාන සමාජ මාධ්‍ය ජාල ඒකකය මගින් සංවිධානය කොට තිබු එක්සත් ජාතික පක්ෂ ගම්පහ දිස්ත්‍රික් සමාජ මාධ්‍ය ජාලා වෙබ් අඩවි ක්‍රියාකාරීන් දැනුවත් කිරීම පිනිස ගම්පහ දිස්ත්‍රික් කාර්යාලයේ පැවති වැඩසටහනකදී මේ බව සඳහන් කළ රුවන් විජයවර්ධන මහතා තවදුරටත් අදහස් දක්වමින් මෙසේද කීය.

" මේ වනවිට රටෙහි පවතින තත්ත්වය අනුව අද තරුණ තරුණියන් විශාල පිරිසක් සමාජ මාධ්‍ය ජාලා මගින් රජයට චෝදනා කරන බවත් මේ නිසා එක්සත් ජාතික පක්ෂයද සමාජ මාධ්‍ය ජාලා භාවිතා කරමින් අපේ මතය මෙන්ම රජය විසින් කරනු ලබන වැරදි ක්‍රියා ජනතාවට පෙන්වාදීම කළ යුතුයි.

අද මේ රටේ මිනිස්සුන්ට ජීවත්වීම අමාරුයි. රජයට කිසිම ප්‍රතිපත්තියක් නැහැ. ආර්ථික ප්‍රතිපත්තියක් නැහැ. ආර්ථිකය කළමනාකරණ කිරීමේ හැකියාවක් මේ රජය ඇත්තේ නැහැ. කිසිම දැනුමක් නැහැ. ඒ නිසා රටේ ජනතාව විශාල වශයෙන් විවිධ ප්‍රශ්නවලට මුහුණ දී සිටිනව. අපි දකිනව පෙට්‍ල් සහ ඩීසල් ලබා ගැනීම පිනිස විශාල වශයෙන් පෝලිම්වල සිටින ආකාරය. අද ගෑස් නැහැ. විදුලිය නැහැ. ප්‍රශ්ණ ගොඩක් තිබෙනව. මිනිස්සුට ජීවත් වෙන්න අමාරුයි. අලුත් අවුරුද්ද වනවිට නම් සහල් මිල ගණන් අඩුකර ලබා දෙයි. නමුත් අවූරුද්දට නම් සහල් මිල ගණන් අඩු වූවත් ඉන් පසුව රටේ ජනතාවට විශාල ආර්ථික අපහසුතාවයකට පත් වීමට සිදුවේවි. මේ යන විදියට තව අවුරුද්දක්වත් රජය ගෙන යාමට හැකිවේදැයි යන්න ප්‍රශ්ණයක්.

අපි දැන් එක්සත් ජාතික පක්ෂය හැටියට අපේ සංවිධාන කටයුතු ආරම්භ කළ යුතුව තිබෙනව. මෙහිදී සමාජ මාධ්‍ය ජාලා සමගින් ඉදිරියට යාම පිළිබඳව සහ දේශපාලන ගමන සම්බන්ධයෙන් සිරිකොත සමාජ මාධ්‍ය ඒකකය මගින් දැනුවත් කරාවි."