(නිමන්ති රණසිංහ)

චීන රටේ ශිෂ්‍ය වීසා ලබා දෙන බව පවසා මුදල් රුපියල් පන්ලක්ෂ හැටදහසක මුදලක් වංචා කිරීමේ චෝදනාවට ‘කොස් ලංකා’ පුද්ගලික සමාගමේ සභාපතිවරයා ඇතුළු අධ්‍යක්ෂවරුන් තිදෙනෙකු වරදකරු කළ කොළඹ කොටුව මහේස්ත්‍රාත් තිළිණ ගමගේ මහතා සැකකරුවන්ගේ ඇගිලි සලකුණු වාර්තා ලැබෙන තෙක් ලබන 18 දා දක්වා රක්ෂිත බන්ධනාගාර ගත කරන ලෙස අද (04) නියෝග කළේය.

මෙම සිද්ධියට අදාළ දීර්ඝ නඩු විභාගයකින් පසු පළමු චෝදනාවට සැකකරුවන් වරදකරු කරමින් මෙම නියෝගය නිකුත් කළ මහේස්ත්‍රාත්වරයා දෙවන චෝදනාවෙන් ඔවුන් නිදහස් කරන ලෙසට නියෝග කළේය. ඒ අනුව දඩුවම් නියම කිරීම සදහා ඇගිලි සලකුණු වාර්තා කැදවන තෙක් සැකකරුවන් රක්ෂිත භාරයේ තැබීමට මෙහිදී මහේස්ත්‍රාත්වරයා නියෝග නිකුත් කළේය.

පැමිණිලිකාර පාර්ශ්වයට වංචා කළ මුදල් නැවත ගෙවන්නේ නම් දඩුවම් අඩු කිරීම සලකා බැලිය හැකි බවත් දුප්පත් ජනතාවගෙන් මුදල් ලබා ගෙන දීර්ඝ කාලයක් ගතව ගොස් ඇති අතර මෙවැනි වංචා සිදුකර මේ සමාජයේ මිනිසුන් කොහේ යන්නේදැයි මෙහිදී මහේස්ත්‍රාත්වරයා විවෘත අධිකරණයේ දී ප්‍රකාශ කළේය.