(බිමල් ශ්‍යාමන් ජයසිංහ)

පුද්ගලයකු පැහැරගෙන ගොස් තියුණු ආයුධවලින් කපා කොටා වෙඩි තබා බරපතල තුවාල සිදුකර මනුෂ්‍ය ඝාතනයකට තැත්කිරීම සම්බන්ධයෙන් අවශ්‍ය ව සිටි ප්‍රධාන සැකකරු රාජගිරිය මාදින්නාගොඩ දී අත්අඩංගුවට ගත් බව පොලිස් විශේෂ කාර්ය බළකාය කියයි.

එම සැකකරු සන්තකයේ තිබී තුර්කියේ නිෂ්පාදිත වායු රයිෆලයක් ව්‍යාජ ජාතික හැදුනුම්පතක්, ව්‍යාජ රියදුරු බල පත්‍රයක් පොලිස් භාරයට ගෙන ඇත.

විශේෂ කාර්ය බළකාය බුද්ධි කොට්ඨාසයේ නිලධාරීන්ට ලද තොරතුරකට අනුව විශේෂ කාර්ය බළකාය අණදෙන නිලධාරී නියෝජ්‍ය පොලිස්පති නීතීඥ වරුණ ජයසුන්දර මහතාගේ නියෝග හා උපදෙස් පරිදි අධ්‍යක්ෂ බුද්ධි පොලිස් අධිකාරී එම්.එම්.කේ. විජේසිංහ මහතාගේ මගපෙන්වීම පරිදි සහකාර පොලිස් අධිකාරී (බුද්ධි/විශේෂ මෙහෙයුම්/මත්ද්‍රව්‍ය නාශක හා සංවිධානාත්මක අපරාධ මර්ධන) සාගර කුලසේකර මහතාගේ අධීක්ෂණය මත බුද්ධි කොට්ඨාශයේ ස්ථානාධිපති ප්‍රධාන පොලිස් පරීක්ෂක නදීක සිල්වා මහතාගේ මෙහෙයවිම ප්‍රකාරව පොලිස් පරීක්ෂක ඩබ්.එම්.කේ.එස්. ප්‍රනාන්දු ඇතුළු නිලධාරීන් කණ්ඩායමක් විසින් වැටලීම සිදුකර ඇත.

කඩවත ප්‍රදේශයේ දී පුද්ගලයකු පැහැරගෙන ගොස් තියුණු ආයුධවලින් කපා කොටා වෙඩිතබා බරපතල තුවාල කර තිබිනි.

අත්අඩංගුවට ගත් ප්‍රධාන සැකකරු මෝදර ප්‍රදේශයේ පදිංචි වයස අවුරුදු 41කි.