(ශ්‍රීනාත් ප්‍රසන්න ජයසූරිය)

අවුරුදු තිහක විවාහකයකු පැහැර ගෙන ගොස් අතුරුදන් කළේ යැයි කියන සිද්ධියේ ප්‍රධාන සැකකරු ලෙස සැලකෙන සිඟිති නමැත්තකු ඔහුගේ බිරිඳ සහ බිරිඳගේ සහෝදරයකු හොර රහසේ රටින් පලා යෑමට පැමිණියහොත් අත්අඩංගුවට ගන්නා ලෙසට කුලියාපිටිය මහේස්ත්‍රාත් අධිකරණයෙන් නියෝගයක් ලබා ගත් බව කුලියාපිටිය මූලස්ථාන පොලිසිය සඳහන් කරයි.

කුලියාපිටිය මහේස්ත්‍රාත් අධිකරණයට මේ සම්බන්ධයෙන් තොරතුරු වාර්තාවක් ඉදිරිපත් කර ආගමන විගමන පාලකවරයාට මෙම නියෝගය නිකුත් කළ බව උසස් පොලිස් නිලධාරියෙක් පැවැසීය.

ඔවුන් තිදෙනා රටින් පලා යෑමට උත්සාහ කරන බවට ලැබුණු තොරතුරු මත මෙවැනි නියෝගයක් ලබාගෙන ඇතැයි ද පොලිස් ආරංචි මාර්ගවලින් දැන ගැනීමට ඇත.

මෙම තිදෙනා සහ ප්‍රධාන සැකකරුගේ දියණිය ඇතුළු දරු තිදෙනා මෙතෙක් සොයා ගැනීමට නොහැකි වී ඇති බව පොලිසිය පවසයි.

කුලියාපිටිය, ඇඹව දික් ඇල්ලේ සුසිත් ජයවංශ නමැති තිස් හැවිරිදි අයෙක් මෙසේ අබිරහස් ලෙස අතුරුදන්ව සිටී.

මොහු විවාහක බිරිඳගෙන් දික්කසාද වී සිඟිති යන අන්වර්ථ නාමයෙන් හැඳින්වෙන පුද්ගලයාගේ දියණිය සමග ද ප්‍රේම සම්බන්ධතාවක් පවත්වාගෙන යමින් සිටි අතරවාරයේ ඇය ගැබ් ගෙන ඇතැයි ද ඒ බව දැනගත් සිඟිති නමැත්තා දෙදෙනා විවාහ කර විදෙස් ගත කිරීමට සැලසුම් කර තිබී ඇති බවද පරීක්ෂණවලින් තොරතුරු අනාවරණය වී යැයි පොලිසිය කියයි.