(යොහාන් භාසුර)

කොළඹ ජාතික රෝහල වටා මාර්ගවල අධික වාහන තදබදය සහ රෝහල තුළ සහ රෝහල අවට ක්‍රියාත්මක දූෂණ ක්‍රියා පාලනයට රෝහල තුළ පොලිස් ස්ථානයක් පිහිටුවන ලෙස එම රෝහලේ පරිපාලනය බලධාරීන්ගෙන් ඉල්ලා සිටියි.  

කොළඹ ජාතික රෝහලට දිනකට පුද්ගලයන් 15,000 ක පමණ පිරිසක් පැමිණෙන බව කියන එම රෝහල් පරිපාලනය එම පිරිස සහ අවට පිරිස පාලනය කිරීමට පොලිස් නිලධාරීන් කීපදෙනෙක්ගෙන් යුත් දැනට පවතින මුරපොළ ප්‍රමාණවත් නොවන බව ද සඳහන් කළේය.

රෝහල තුළ පොලිස් ස්ථානයක් පිහිටුවන ලෙස වෛද්‍යවරු, නීති හා සාමය අමාත්‍ය ටිරාන් අලස් මහතාගෙන් ඉල්ලීමක් ද කර ඇති බවත් පොලිස් ස්ථානයක් පිහිටුවන්නේ නම් ඒ සඳහා ගොඩනැගිල්ලක් දියහැකි බවත් එම පරිපාලනය කියයි.

රෝහල වටකර ඇති සියලුම මාර්ගවල කාර්ය බහුල වේලාවේ දැඩි වාහන තදබදයක් පැවතීම රෝගී සත්කාරවලට විශාල බාධාවක් බව කියන එම රෝහල් පරිපාලනය මෙම තත්වය පිළිබඳව පොලිසිය සමඟ සාකච්ඡා කර දැනුවත් කිරීමට පියවර ගත් බව ද සඳහන් කළේය.

ඇතැම් කුලී රථ හදිසි අනතුරු ඒකක අසළ මාර්ග අවහිර වන ලෙස අඛණ්ඩව කටයුතු කරන්නේ යැයි නිරන්තරයෙන් පැමිණි ලැබෙන බවත් මාර්ග රාජකාරියේ නිරතවන නිලධාරීන් ඒ පිළිබඳව දැඩි අවධානය යොමු කළ යුතු බවත් රෝහල් පරිපාලනය වැඩි දුරටත් සඳහන් කරයි.