(ඩයනා උදයංගනී)

කැළණි ගඟ දෙපස පරිසර වාර්තා ලබා නොගත් කර්මාන්ත ශාලා 4000ක් පමණ ඇතැයි පරිසර අමාත්‍ය මහින්ද අමරවීර මහතා පැවසීය. 

කඩුවෙල සිට පෑලියගොඩ පාළම දක්වා ගඟ දෙපස  කර්මාන්ත ශාලා 7000ක් පමණ පිහිටා ඇති බවත් ඉන් පරිසර වාර්තා ලබා ගෙන ඉදිකර ඇත්තේ කර්මාන්ත ශාලා 3000ක් පමණ ප්‍රමාණයක් පමණක්  බවත් පරිසරවේදීන් තමාට පෙන්වා දී ඇතැයි අමාත්‍යවරයා සඳහන් කළේය.

කොළඹ නගරයට ජලය සපයන ප්‍රධාන ජල මුලාශ්‍රය වන කැළණි ගඟ දෙපස ඇති පරිසර වාර්තා ලබා නොගත් මෙම කර්මාන්ත ශාලා පිළිබඳ කඩිනම් අධ්‍යයනයක් සිදුකර තමන්ට වාර්තාවක් ලබාදෙන්නැයි ඇමැතිවරයා මධ්‍යම පරිසර අධිකාරියට දැනුම්දීමක් ද කර තිබේ.

එමෙන්ම පරිසර සංරක්ෂණය උදෙසා ජනාධිපති ගෝඨාභය රාජපක්ෂ මහතාගේ නායකත්වයෙන් හා අමාත්‍යාංශ 16ක ලේකම්වරුන්ගේ සාමාජිකත්වය යටතේ පරිසර ආරක්ෂණ බළකායක් පිහිටුවීමට කටයුතු යොදා  ඇතැයි ද ඇමැතිවරයා කීය.