(රවින්ද්‍ර ප්‍රභාත් නෙත්තසිංහ)

කුලියාපිටිය ප්‍රාදේශිය ලංකාදීප මාධ්‍යවේදී දිනේෂ් උපේන්ද්‍ර මහතාගේ කාර්‍යාල පරිශ්‍රයට බලහත්කාරයෙන් ඇතුළුවූ මැර පිරිසක් පහරදීම හේතුවෙන් ඔහු ප්‍රතිකාර සඳහා කුලියාපිටිය ශික්ෂණ රෝහලට ඇතුළත් කර ඇතැයි කුලියාපිටිය මූලස්ථාන පොලිසිය කියයි.

කුලියාපිටිය නගරයේ පිහිටි වෙළද සංකීර්ණයක උඩු මහලේ තිබූ එම කාර්‍යාලයේ දොරගුළු කිසියම් පුද්ගලයකු කඩාදැමීම හේතුවෙන් උපේන්ද්‍ර මහතා පොලිසියට පැමිණිල්ලක් ඉදිරිපත් කර තිබිණ.

එම පැමිණිල්ලට අදාල පරීක්ෂණ සදහා  පොලිසිය පැමිණි අවස්ථාවේ දී එහි පැමිණි වීඩියෝ කැමරාකරුවකු සහ කළු ඇදුමින් සැරසුනු පිරිසක් බලහත්කාරයෙන් කාර්‍යාලය ට ඇතුළුවී ඒ තුල වීඩියෝ දර්ශණ ලබාගෙන ඇත. ඒ සම්බන්ධයෙන් මාධ්‍යවේදී උපේන්ද්‍ර මහතා ප්‍රශ්න කල අවස්ථාවේ දී පරීක්ෂණයට පැමිණි පොලිස් නිලධාරීන් ඉදිරියේදීම එම කැමරාවක් ඇතැතිව සිටි පුද්ගලයා උපේන්ද්‍ර මහතාට පහරදී ඇත.