(අංජුල මහික වීරරත්න)

කොම්පඤ්ඤ වීදිය පොලිස් බල ප්‍රදේශයේ අඩු ආදායම් ලබන පවුල් 2500ක් සඳහා සහන සලසන "ප්‍රජා මුළුතැන්ගෙය" වැඩසටහන කොළඹ  හුණුපිටිය ගංගාරාම විහාරස්ථානයේදී ඇරඹිණි.

ආහාර සපයා ගැනීමට අපහසුතා ඇති  හුණුපිටිය, කොම්පඤ්ඤවීදිය, ගාලු මුවදොර, ඉබ්බන්වල සහ වෑකන්ද ග්‍රාම නිලධාරී  වසම් වල ජනතාව ඉලක්ක කරගනිමින් ක්‍රියාත්මක  මෙම වැඩසටහන ජනවාරි 01 දා සිට දින 40ක් ක්‍රියාත්මක කිරීමට නියමිතය. 

මෙහිදී  ස්වයං රැකියා අවස්ථා නිර්මාණය, වෘත්තිය පුහුණුව ලබාදීම, සාමාජීය දියුණුව සැලසීම වැනි සුබසාධන වැඩසටහන් මගින් ජනතාවගේ ආර්ථික තත්වයන් ඉහල නංවාලීමට පියවර ගෙන තිබෙන බව ජනාධිපති කාර්යාලය පවසයි.

ජනාධිපති කාර්යාලය මූලික කරගනිමින් ත්‍රිවිධ හමුදාව, පොලිසිය, සිවිල් ආරක්ෂක දෙපාර්තමේන්තුවේ සහ  රජයේ ආයතන මෙන්ම,  ජාත්‍යන්තර සිංහ සමාජය, රොටරි සමාජය සහ පෞද්ගලික ආයතන රැසක සහයෝගයෙන් ගංගාරාම විහාරස්ථ දායක කාරකාදීන්ගේ දායකත්වයෙන් මෙම ප්‍රජා මුළුතැන්ගෙය ක්‍රියාත්මක වේ.