(විමුක්ති එස් රුද්‍රිගු)

එකම දිනයේ දෙවතාවක් මියගිය කාන්තාවක් පිළිබඳ තොරතුරු ඇමෙරිකාවේ නෙබ්‍රස්කා ප්‍රාන්තයෙන් වාර්තා වූවේය. නෙබ්‍රස්කා ප්‍රාන්තයේ අගනගරය වන ලින්කන්හි සත්කාර ලබමින් සිටි මෙම කාන්තාව පසුගිය 3 වැනිදා උදෑසන 9.44 ට ප්‍රථම වතාවට මියගොස් ඇතැයි ලින්කන් නගර බලධාරීහු ප්‍රකාශ කළහ.

මෙලෙස මියගොස් ඇත්තේ 74 හැවිරිදි කොන්ස්ටන්ස් ග්ලාන්ට්ස් නැමැති කාන්තාවක් බව බලධාරීහු ප්‍රකාශ කළහ. කොන්ස්ටන්ස් ග්ලාන්ට්ස් මියගිය බවට එම සාත්තු නිවාසයේ වෛද්‍යවරයා නිල වශයෙන්  ප්‍රකාශයට පත් කිරීමෙන් අනතුරුව ඇයගේ මෘත දේහය බුතෙරස් මේසර් සහ ලව් මල් ශාලාව වෙත ඒවා ඇතැයි බලධාරීහු පැවැසූහ.

පැය කීපයකට පසු මල්ශාලවේ කාර්ය මණ්ඩලය මෘත දේහය අවසන් කටයුතුවලට සූදානම් කිරීම පැමිණ ඇති බවත් එම අවස්ථාවේ ග්ලාන්ට්ස් තවමත් ජිවත්වන බව ඔවුන් දැක ඇති බවත් බලධාරීහු ප්‍රකාශ කළහ.වහාම ක්‍රියාත්මකවූ මල් ශාලාවේ කාර්ය මණ්ඩලය ග්ලාන්ට්ස්ට වාහම කෘතිම ස්වසනය ලබාදී හදිසි ඇමතුම් අංකයට සිද්ධිය දැනුම් දී ඇතැයි බලධාරීහු පැවැසූහ.

හදිසි සේවා ගිලන් රථයක් එම ස්ථානයට පැමිණ ග්ලාන්ට්ස්ව වහාම රෝහලට ඇතුළත් කර ඇති බවත් අනතුරුව ඇයගේ පවුලේ සාමාජිකයන්ට සිදුවීම දැනුම් දී ඇති බවත් බලධාරීහු ප්‍රකාශ කළහ.

නමුත් අවාසනාවන්ත ලෙස නැවත වරක් ඇය එදිනම දහවල් කාලයේදී රෝහලේදී මියගොස් ඇති බව බලධාරීහු පැවැසූහ. මෙම අවාසනාවන්ත සිදුවීම සම්බන්ධයෙන් මේ වනවිට විමර්ශනයක් ආරම්භ කර ඇති බවත් විමර්ශනය අවසානයේදී සිද්ධියේ සුලමුල අනාවරණය කර ගැනීමට හැකිවනු ඇති බවත් බලධාරීහු පැවැසූහ.