(ඇල්ල ප්‍රසාද් රුක්මල් සහ මහින්ද නිශ්ශංක) 

පස්කදු ගල්පර්වත කඩා වැටීමෙන් අවහිර වී ඇති උඩරට දුම්රිය මාර්ගයේ  බදුල්ල සහ   දෙමෝදර දුම්රිය   ධාවනයට තව දින කීපයක් ගතවන  හෙයින් කොළඹ කොටුව බදුල්ල අංක 1045 රාත්‍රී තැපැල් දුම්රිය සහ බදුල්ල කොළඹ කොටුව අංක 1046 රාත්‍රි තැපැල් දුම්රිය  දැනට කොළඹ කොටුව  බණ්ඩාරවෙල   දුම්රිය     ස්ථානය දක්වා පමණක් ධාවනය වන බව   නාවලපිටිය දුම්රිය පාලක මැදිරිය  අද (29)  පැවසීය.

ඒ අනුව බණ්ඩාරවෙල සිට රාත්‍රි  8.00ට  අංක  1046 දරන රාත්‍රී තැපැල් දුම්රිය කොළඹ කොටුව බලා ධාවනය වන බවද නාවලපිටිය දුම්රිය පාලක මැදිරිය පවසයි.

බදුල්ල දිස්ත්‍රික්කයේ පතිත වූ ධාරානිපාත වර්ෂාවත් සමඟ උඩරට දුම්රිය මාර්ගයේ හාලිඇල දෙමෝදර අතර දුම්රිය මාර්ගයට ඉකුත් (25) වන දින විශාල පස්කන්දක් කඩා වැටීමෙන් බදුල්ල දෙමෝදර අතර දුම්රිය ධාවනය මේ වනවිටත් මුලුමනින්ම ඇණ හිට තිබේ.

නානුඔය ප්‍රධාන  දුම්රිය මාර්ග අධීක්ෂණ කළමනාකරු ඇන්ටන් විරෝෂන් වික්‍රමරත්න මහතා ඇතුලු නිලධාරීන් පිරිසක් ඊයේ (28) පස්වරුවේ මෙම ස්ථානයට පැමිණ පරික්ෂා කරමින් එම පස්කදු ඉවත් කිරීමට අවශ්‍ය කටයුතු සිදු කරනු ලැබූහ.

කෙසේ වෙතත්  එම දුම්රිය මාර්ගය ට  පස්කන්ද   කඩා වැටී ස්ථානයයේ ජල පහරක් තවමත් ගලායමින් නායයාම සක්‍රීය මට්ටමේ ඇති බවත් එම පස් ඉවත් කිරිමේදී තව දුරටත් පස්කදු කඩා වැටෙන බවත් දුම්රිය බලධාරීන් කීහ.

කෙසේ වෙතත් දැනට දුන්හිඳ , ඇල්ල  ඔඩිසි දුම්රියන් ඇල්ල කොළඹ කොටුව අතරත්, පොඩිමැනිකේ , උඩරටමැණිකේ ,විශේෂ සීඝ්‍රග්‍රාමි දුම්රිය මෙන්ම භාණ්ඩ ප්‍රවාහන මිශ්‍ර  දුම්රිය නානුඔය සිට කොළඹ කොටුව , මහනුවර බලා ධාවනය වන බවද නාවලපිටිය දුම්රිය පාලක මැදිරිය පවසයි.