(සුජිත් හේවාජුලිගේ )

ඉන්ධන ප්‍රශ්නය නිසා විශේෂයෙන්ම ඈත දුර බැහැර ප්‍රදේශවල මන්ත්‍රීවරුන් පාර්ලිමේන්තු රැස්වීම්වලට සහභාගිවීම සඳහා මේ සතියේ පැමිණීමද ගැටළුකාරීවී ඇතැයි වාර්තාවේ.

මේ ප්‍රශ්නය  පිළිබඳව ආණ්ඩු පක්ෂයේ සහ විපක්ෂයේ   මන්ත්‍රීවරුන් පිරිසක්  දැනටමත් කතානායකවරයාගේ අවධානයට  යොමු කර ඇතැයි  පාර්ලිමේන්තු ආරංචි මාර්ගවලින් පැවසේ.

මන්ත්‍රීවරුන් පිරිසක්  මේ පිළිබඳව හෙට (22) පාර්ලිමේන්තු රැස්වීමේදීද  අදහස් දැක්වීමට නියමිතය.

මේ අතර  මැති ඇමැතිවරුන් රැසක්ද  සිය වාහනවලට ඉන්ධන ලබා  ගැනීම සදහා පසුගිය දින කිහිපයේදී  දිවයිනේ විවිධ ප්‍රදේශවල  ඉන්ධන පෝලිම්වලට එක්වී සිටි බව  වාර්තාවේ.

මෙසේ පෝලිම්වල සිට  ඉන්ධන ලබා ගෙන ඇති මැති ඇමැතිවරුන් අතර  ඩලස් අලහප්පෙරුම රාජිත සේනාරත්න, චන්දිම වීරක්කොඩි ගීතා කුමාරසිංහ මුජිබර් රහුමාන්, ජේ සී අලවතුවල, උදය ගම්මන්පිල, සහ  තුෂාර ඉඳුනිල් යන අයද වෙති .

විපක්ෂ නායක සජිත් ප්‍රේමදාස මහතාගේ  රියදුරන්ද ඉන්ධන පෝලිම්වල සිට  ඉන්ධන ලබා ගෙන ඇතැයි   පැවසේ.

මේ සම්බන්ධයෙන් අදහස් දැක්වූ සමගි ජන බලවේගයේ  කොළඹ දිස්ත්‍රික් පාර්ලිමේන්තු මන්ත්‍රී  මුජිබර් රහුමාන් මහතා පැවසුවේ තමා මාළිගාවත්ත ප්‍රදේශයේ  ඉන්ධන පිරවුම් හලක පසුගිය සෙනසුරාදා  පැය භාගයකට වැඩි කාලයක් රැඳී සිට  සිය වාහනයට  ඉන්ධන ලබා ගත් බවයි.

මන්ත්‍රීවරුන්ට විශේෂත්වයක් දක්වා ඉන්ධන ලබා දෙන වැඩපිළිවෙලක් ක්‍රියාත්මක නොවන බවද ඔහු සඳහන් කළේය.