(යොහාන් භාසුර, ගයාන් සූරියආරච්චි සහ බිමල් ශ්‍යාමන් ජයසිංහ)

විශ්‍රාමික ජ්‍යෙෂ්ඨ නියෝජ්‍ය පොලිස්පති ප්‍රියන්ත ජයකොඩි මහතා අපරාධ පරීක්‍ෂණ දෙපාර්තමේන්තුව අත්අඩංගුවට ගත් බව පොලිස් මාධ්‍ය ප්‍රකාශක සහකාර පොලිස් අධිකාරී උදය කුමාර වුට්ලර් මහතා  ‘ලංකාදීප’යට පැවසීය.

රෝගී තත්වයක් හේතුවෙන් රාගම ප්‍රදේශයේ පෞද්ගලික රෝහලක ප්‍රතිකාර ලබමින් සිටියදී ඒ මහතා අද (28) පස්වරුවේ අත්අඩංගුවට ගත් අතර අපරාධ පරීක්‍ෂණ දෙපාර්තමේන්තුව භාරයේ එම රෝහලේ ඒ මහතා මේ වන විට ප්‍රතිකාර ලබමින් සිටින බවත් විශ්‍රාමික ජ්‍යෙෂ්ඨ නියෝජ්‍ය පොලිස්පතිවරයා හෙට (29) දිනයේ අධිකරණයට ඉදිරිපත් කිරීමට නියමිත බවත් වුට්ලර් මහතා කීය.

විදේශ රටක සිට මෙරට මත්ද්‍රව්‍ය සහ සංවිධානාත්මක අපරාධ මෙහෙයවන නමගිය සංවිධානාත්මක අපරාධකරුවකු මරණ තර්ජනය කළ බවට කළ අසත්‍ය පැමිණිල්ලක් පිළිබඳව කළ විමර්ශනයකට අදාලව ජයකොඩි මහතා අපරාධ පරීක්‍ෂණ දෙපාර්තමේන්තුව මෙසේ අත්අඩංගුවට ගත් බව ද පොලිස් මාධ්‍ය ප්‍රකාශකවරයා කීය.

විදේශ රටක සිටින ප්‍රබල සංවිධානාත්මක අපරාධකරුවකු යැයි කියන ‘කෙහෙල්බද්දර පත්මේ’ තමන්ට මරණ තර්ජන කළ බවට විශ්‍රාමික ජ්‍යෙෂ්ඨ නියෝජ්‍ය පොලිස්පති ප්‍රියන්ත ජයකොඩි මහතා මීට දින කීපයකට පෙර වැඩබලන පොලිස්පතිවරයාට පැමිණිළි කර තිබුණි.

කෙසේ වෙතත් එම මරණ තර්ජනය කළ පුද්ගලයා යැයි සැක පුද්ගලයෙක් මහනුවර ප්‍රදේශයේදී මීට දින තුනකට පෙර අපරාධ පරීක්‍ෂණ දෙපාර්තමේන්තුව අත්අඩංගුවට ගෙන තිබූ බවත් ඔහුගේ දුරකථනය පරීක්‍ෂා කිරීමේදී ‘කළ උදව්වට ස්තූතියි’ ආදි ලෙස ප්‍රියන්ත ජයකොඩි මහතා යොමු කළේ යැයි කියන කෙටි පණිවුඩ තිබූ බවත් පොලිස් ආරංචි මාර්ග සඳහන් කරයි.

මත්ද්‍රව්‍ය ජාවාරමට සම්බන්ධ යැයි කියන අදාල පුද්ගලයා ලවා ප්‍රියන්ත ජයකොඩි මහතා, හිටපු මහජන ආරජෂක අමාත්‍යවරයකුට, හිටපු පොලිස්පතිවරයකුට, සක්‍රීය සේවයේ සිටින ජ්‍යෙෂ්ඨ නියෝජ්‍ය පොලිස්පතිවරයකුට සහ ජයකොඩි මහතාගේ සමීප ඥාතියකුට තර්ජනාත්මක දුරකථන ඇමතුම් දී ඇති බවත් අදාල පුද්ගලයා ඩුබායි රාජ්‍යයේ සිට එම ඇමතුම් දී ඇතැයි පොලිස් විමර්ශනවලදී අනාවරණය වී ඇති බව ද පොලිස් ආරංචි මාර්ග සඳහන් කරයි.

එම ඇමතුම් ඩුබායි සිට අදාල පුද්ගලයන්ට දුන්නේ යැයි අත්අඩංගුවට පත්ව සිටින සැකකරු මෙරටට පැමිණ එම විදේශ සිම්පත තිබූ දුරකථනයට මෙරට සිම්පතක් ඇතුළත් කිරීමෙන් ඔහු හදුනාගැනීමට හැකිවී ඇතැයි වැඩි දුරටත් දැනගන්නට තිබේ.