(මනෝප්‍රිය ගුණසේකර)
යාපනයේ වායු දූෂණය අවම කිරීම සඳහා ගත හැකි සියලුම පියවර ගන්නා ලෙස අභියාචනාධිකරණය යාපනය මහ නගර සභාවට අද නියෝග කළේය.
යාපනය ප්‍රදේශයේ වායු දූෂණය අවම කිරීම සම්බන්ධයෙන් පරිසර පනත්වල විධිවිධාන අනුව යාපනය නගර සභාව කටයුතු නොකරන බව  අභියාචනාධිකරණ සභාපති විනිසුරු රොහාන්ත අබේසුරිය මහතාගේ ප්‍රශ්ණයකදී පිළිගැනීමෙන් අනතුරුව එලෙස නියෝග කළේය.
යාපනයේ වෛද්‍යවරයකු වන උමා සුඛී නඩරාජා මෙනවිය ගොනු කළ පෙත්සමක් විභාගයට ගත් අවස්ථාවේදී ඉදිරිපත් වු කරුණු සැළකිල්ලට ගනිමින් අභියාචනාධිකරණය එසේ නියෝග කරනු ලැබීය.
අභියාචනාධිකරණයේ සභාපති විනිසුරු රොහාන්ත අබේසූරිය සහ ප්‍රියන්ත ප්‍රනාන්දු යන මහත්වරුන්ගෙන් සමන්විත විනිසුරු මඩුල්ලක් හමුවේ රිට් පෙත්සම සලකා බැලණි.
වෛද්‍ය උමා සුඛී නඩරාජා මෙනවිය ගොනු කළ පෙත්සම වගඋත්තරකරුවන් වශයෙන් මධ්‍යම පරිසර අධිකාරිය සහ යාපනය නගර සභාව ඇතුළු පිරිසන් නම් කර ඇත.යාපනය ප්‍රදේශයේ කැලිකසල හේතුවෙන් ප්‍රදේශයේ වායු දූෂණය සිදුවන බවත් මෙම තත්ත්වය වැළැක්වීමට වගඋත්තරකරුවන් කටයුතු නොකරන බවත් පෙන්වා දෙන වෛද්‍ය උමා සුඛී නඩරාජා මෙනවිය යාපනය ප්‍රදේශයේ වායු දූෂණය වැළැක්වීමට කටයුතු කරන ලෙස වගඋත්තරකරුවන්ට නියෝග  කරන්නැයි ඉල්ලා සිටින්නීය.