(අංජුල මහික වීරරත්න)

මුල් ළමා විය රැකවරණය සහ සංවර්ධනය පිළිබඳ ජාතික බහු ආංශික උපාය මාර්ගික ක්‍රියාකාරී සැලැස්ම 2025-2029' ක්‍රියාවට නැංවීමට කැබිනට් අනුමැතිය ලැබී ඇත.

සෑම ශ්‍රී ලාංකික දරුවකුටම තම උපරිම විභවතාවන් ළඟා කර ගැනීමට සහාය වන පරිසරයක් සැකසීම සඳහා ' මුල් ළමා විය රැකවරණය සහ සංවර්ධනය පිළිබඳ ජාතික ප්‍රතිපත්තිය ' ක්‍රියාත්මක කිරීම සඳහා දැනටමත් අමාත්‍ය මණ්ඩල අනුමැතිය ලබා දී ඇත. එම ජාතික ප්‍රතිපත්තිය උපාය මාර්ගික ක්‍රියාකාරී සැලැස්මක් හරහා ක්‍රියාත්මක කළ යුතුව තිබේ. ඒ අනුව, සියලුම පාර්ශ්වකාර ආයතන වල සහභාගීත්වයෙන් ' මුල් ළමාවිය රැකවරණය සහ සංවර්ධනය පිළිබඳ ජාතික බහු ආංශික උපාය මාර්ගික ක්‍රියාකාරී සැලැස්ම 2025-2029' සකස් කරනු ලැබ ඇත. 

එම ක්‍රියාකාරී සැලැස්ම ක්‍රියාවට නැංවීම මඟින් අවදානමට ලක්විය හැකි හා අවාසිදායක තත්ත්වයක සිටින ළමයින්ට විශේෂ අවධානය යොමු කරමින් සෞඛ්‍ය, පෝෂණය, අධ්‍යාපනය, සමාජ සේවා රැකවරණය සහ ආරක්ෂාව වැනි අත්‍යවශ්‍ය සේවා සැපයීමට අපේක්ෂා කෙරේ. 

ඒ අනුව, මුල් ළමා විය රැකවරණය සහ සංවර්ධනය පිළිබඳ ජාතික බහු ආංශික උපායමාර්ගික ක්‍රියාකාරී සැලැස්ම 2025-2029' ක්‍රියාත්මක කිරීම පිණිස වැඩ බලන කාන්තා සහ ළමා කටයුතු අමාත්‍යවරයා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.